Қазақ теміржолының тарихы тағылымға толы. Күні кеше осынау салада ерен еңбек етіп, шойын жолды бүгінгі буынға аманаттаған алдыңғы буынға қашанда құрмет зор. Семей өңірінің теміржолшылары үшін өмірі мен еңбек жолы аңызға айналған сондай даңқты тұлғалардың бірі — Қапсидар Омаров. Артында өлмейтіндей із қалдырған даңқты сала маманының туғанына биыл 100 жыл толады. Міне, осынау айтулы датаға орай аптаның дүйсенбісінде Семейдегі «Түрксіб-Семей» мұражайында теміржол тарланын еске алуға арналған салтанатты кеш өтті. Шараға қалалық ішкі саясат бөлімінің басшысы Айдар Садырбаев, қалалық ардагерлер кеңесінің төрағасы Амантай Доғалақов, Семей темір жол бөлімшесінің басшылығы, сала мамандары мен Қапсидар Омарұлының ұрпақтары қатысты.
Қапсидар Омаров Семей белгі беру және байланыс дистанциясында 20 жылға жуық уақыт басшы болған. Жергілікті ұлт өкілінен шыққан алғашқы теміржол саласы басшыларының бірегейі болғандықтан ба, Қ. Омарұлы қазақтың қара домалақтарын шойынжолда қызмет етуге көптеп тартқан екен. Оның тәрбиесін көрген, тәлімін терген теміржолшылардың көпшілігі кейін аталмыш саланың майталмандарына, білікті басшыларына айналды. Бұл жайында Қапсидар Омаровтың еңбектегі ерліктері жайында баяндама жасаған Мақсұт Көшжанов тұшымды жеткізді. Бүгінгі мұражай басшысы, белсенді қарияның өзі де заманында даңқты тұлғаның қол астында қызмет етіп жүрген шақта қамқорлығын көріпті.
Салтанатты жиын барысында ардагер тұлға өмірінің елеулі тұстары жайлы келелі әңгіме қозғалды. Ол кісінің еңбек жолының негізгі ерекшеліктері көп. Атап айтсақ, соғыс жылдарында тұңғыш рет қазақтан шыққан Семейдегі белгі беру және байланыс дистанциясының директоры болған. Сондай-ақ 1964 жылы Мәскеу қаласындағы көрмеде өндірістегі өнертапқыштығы үшін қола медаль иеленген еді.
Еске алу кешінде Семей магистральдық желі бөлімшесінің басшысы Талғат Еспанов сөз алып, ардагер ағаның тәлімін көрген шәкірттеріне, Қапсидар Омаров қалыптастырған династиялық тізбекке де тоқталып өтті.
-Теміржолшылар арасында ШЧ-да қызмет атқаратын мамандарды, яғни, байланысшыларды «Теміржол интеллигенциясы» деп атау қалыптасқан. Әрине, қызметтің күрделілігіне байланысты аталса керек. Ол заманда бұл қызметке біздің ұлттың өкілдерін «қолдарынан келмейді» деп жібере бермейтін-ді. Бұл қасаң қағиданы алғашқы болып бұзған Қапсидар Омаров болды. Сөйтіп, Қазақстан бойынша тұңғыш рет қазақтан шыққан байланыс саласының басшысы атанды Һәм Қапсидар ағамыз осынау қызметке лайықтап тұтас буынды тәрбиелеп кетті. Мәселен, қазір арамызда отырған Айткен Белгібайұлын баулып, өзінен кейін басшылық қызметке қалдырды. Бүгінгі Семей белгі беру және байланыс дистанциясының жас басшысы Бейбіт Түменғали да, оның әкесі мен ағалары дара тұлғаның ізін жалғастырып, бір ғана аталмыш салада еңбек сіңірді. Қорыта айтқанда, Қапсидар Омаров қазақ байланысшыларының тұтас бір мектебін қалыптастырған тұлға, — деді Талғат Жұманұлы.
Сондай-ақ Қапсидар Омарұлымен 1950 жылдары бірге еңбек еткен, сол жылдары Семей белгі беру және байланыс дистанциясының аға инженері болған, бүгінде жасы тоқсаннан асқан ардагер Дмитрий Литвиненко да сөз алып, естеліктерімен бөлісті. Бүгінде сағынышқа айналған ағаның жұмыс істеу тәртібі, жастарға жасаған қамқорлығы жайында ой өрбітті. Әйтсе де Қапсидар Омарұлының өмірі тым қысқа болды. 1967 жылы кенеттен дүние салды.
Аталмыш басқосуға сонау Мәскеу қаласынан және еліміздің өзге қалаларынан Қапсидар Омарұлының қыздары Әлия мен Роза арнайы келген екен. Әке жайында естеліктерімен бөліскен ұрпақтары тағылымды іске ұйытқы болған Семейдегі теміржол саласы басшыларына алғысын білдірді.
Әйгерім СӘРСЕНҒАЛИ, «Семей таңы»
