Сәрсенбі, 12 қыркүйек күні Семей қаласының Шаған кентіне қалалық мәслихат депутаттары арнайы барып, бірқатар әлеуметтік нысандарды аралап, кенттің тыныс-тіршілігімен танысты. Мәслихат хатшысы Бейсенбек Ақжалов, депутаттар Дариға Дайрова, Марлен Көкірекбаев, Нұрғазы Қайырбеков Шағандағы жағдаймен жете танысқан болатын.
Шаған кенті — 500-ге жуық тұрғыны бар шағын ғана елді мекен. Кентте бір қабатты әкім аппараты ғимараты, жалпы орта білім беретін мектеп, дәрігерлік амбулатория, Қазпошта бөлімшесі бар. Кенттің бүгіндегі жағдайымен жете танысу мақсатында келген халық қалаулылары бірінші кезекте ауыл әкімі аппараты ғимаратына барды. Әкім аппаратында 5 қызметкер жұмыс істейді. Олар әкім, кадр жұмысы, ауыл шаруашылығы, әлеуметтік, бухгалтерлік және экономика сұрақтары бойынша бас мамандар. Әкімдік қызметкерлерінен кент тұрғындарының әлеуметтік жағдайы сұралды. Кент әкімі Талғат Құмаровтың айтуынша, мұнда жұмыссыздар жоқ. Тұрмысы төмен отбасыларға, мүмкіндігі шектеулі жандарға, қарттар мен жалғыз басты адамдарға әлеуметтік көмек көрсетіледі.
Бұдан кейін депутаттар дәрігерлік фельдшерлік пунктіне бет бұрды. Салынғанына 60 жылдан асқан ғимараттың бүгінде тозығы жеткен. Нысанда жүкті әйелдерге арналған бөлме және қабылдау бөлмесі бар. Мекеме ішіндегі жабдықтар да ескірген. Мұнда медициналық қызмет көрсететін екі медбике бар екен. Тұрғындардың басы ауырып, балтыры сыздағанда жүгінетін жері осы. Ал ауыр жағдайдағы науқастарға қаладан жедел жәрдем шақыртылады. Сырқат жандардың портал арқылы кезекке тұруға мүмкіндігі бар. Сондай-ақ медициналық тексеру, алдын ала екпе жұмыстары жүргізіледі. Тұрғындар арасында артериялық қан қысымы мен жүрек — қан тамырларының ауруы жиі кездеседі. Осы жерде мәслихат хатшысы Бейсенбек Ақжалов қажет жабдықтар бойынша қалалық әкімдікке өтінім жазуды тапсырды.
Кентте «№24 Шаған кенті негізгі білім беретін мектеп» коммуналдық мемлекеттік мекемесі бар. Ғимараттың тарлығына байланысты 63 оқушы 2 ауысымда оқиды. Бұған қоса кадр жетіспеушілігі мәселесі де бар. Мектепте 13 ұстаз қызмет атқарады. Бірақ биология, тарих, география, информатика пәндері мен бастауыш сынып мұғалімдері жетіспейді. Кабинеттердің жетіспеушілігі мен сыныпта оқушы санының аздығына байланысты екі сыныпқа бір оқу кабинетінде сабақ өтуде.
— Биылғы оқу жылында сегіз бала білім ордасының табалдырығын аттаса, тоғыз бүлдіршін мектепалды даярлық тобында. Мектеп бүгінде екі ауысым бойынша жұмыс істейді. Себебі оқу бөлмелері жетіспейді. Бұл оқушылардың сапалы білім алуына кері әсерін тигізеді. Сондықтан мектепті кеңейтсе немесе шағындау жаңа мектеп ғимаратын салып берсе жақсы болар еді,- деді №24 Шаған кенті мектебінің мұғалімі Әсемгүл Семізбаева.
Айта кетейік, мектеп те, медпункт те пеш арқылы жылытылады.
Шаған кенті шойын жолдың дәл іргесінде. Халық қалаулылары Шаған станциясын да назардан тыс қалдырмады. Мұндағы ғимараттың сапасы жақсы. Нысан «ҚТЖ ҰК» АҚ-ның қарамағында. Бірақ станция ғимараты қазір бос тұр. Семей қалалық мәслихатының депутаты, «ҚТЖ ҰК» АҚ Семей жүк тасымалы филиалының директоры Марлен Көкірекбаев тарапынан әкімдік пен медицина пунктінің қызметкерлерін осы нысанға көшіру ұсынылды. Бірақ бұл нақты емес. Алдағы уақытта станция ғимаратын жалға алу, мектепке беру жағы бірлесе, ақылдаса шешіледі.
— Бүгін Шаған кентіне халықтың әлеуметтік тұрмысын көру, шешімін таппаған мәселелерді қарастыру мақсатында келдік. Әкімдік ғимаратын, мектеп пен Шаған станциясын аралап, кенттің бүгінгі тынысымен таныстық. Мұндағы маңызды мәселе — білім мекемесінің жағдайы. Әкімдік жаңа мектеп саламыз деп айтқан болатын. Бірақ бұл мәселе біздің назарымызда, әлі де қаралу үстінде. Бұдан кейін Шаған станциясы кімнің қарамағына беріледі деген сұрақ тұр. Бұл мәселе жөнінде депутаттар тұрғындармен сөйлесті. Олар бірнеше нұсқаларын ұсынып отыр. Мәселен, станция бос тұрғандықтан, онда тұрғындардың сұрауы бойынша қатым өткізіледі екен. Сондықтан нысанды халыққа клуб ретінде не болмаса бірінші — төртінші сынып оқушыларына арналған мектеп ретінде беру керек деген ұсыныстар бар. Ғимарат қала бюджетіне өткеннен кейін, қалалық әкімдікте қарастырып, бір шешімін табамыз,- деді қалалық мәслихаттың депутаты Нұрғазы Қайырбеков.
Кент әкімі Талғат Құмаровтың айтуынша, тұрғындар ағымдағы жылы орталықтандырылған ауыз сумен қамтамасыз етіледі деп жоспарлануда. 136 аулада жеке жер асты суын шығаратын құдықтар бар. 2016 жылы кенттегі жер асты суының қорын анықтау үшін іздестіру-барлау жұмыстары жүргізілді. Қазіргі таңда жобалық-сметалық құжаттарын дайындауда. Кент көшелері жарықпен қамтылған. Сондай-ақ тұрғындарды азық-түлікпен қамтамасыз ететін 2 дүкен мен 1 наубайхана жұмыс істейді.
Құралай ҚАЙЫРЖАНҚЫЗЫ, Семей қаласы.
