Жуырда, Ұлы Абайдың 175 жыл-дық мерейтойына орай, облыс-тық Абай атындағы кітапханада тағылымдық мәні зор шара өтті. Қаламыздағы оқу орындарының студенттері, зиялы қауым өкілдері қатысқан басқосу барысында арнайы кітап көрмесі де ұйымдастырылып, жұртшылыққа кеңінен таныстырылды.
Айта кетсек, «Абай мұрасы — адамзаттың баға жетпес қазынасы» деген атаумен өткен көрменің көздеген негізгі мақсаты аудиторияны Абай мұрасына арналған сирек кітаптармен таныстыру болатын. Көрмеге қойылған туындыларға әсіресе жастар жағы ерекше ықыластық танытты.
Ұйымдастырушылардың айтуынша, аталмыш көрме бес бөлімнен тұрады. Оның ішінде өз заманында хакім Абай оқыған, құмартқан кітаптар қоры жеке әзірленген. Сонымен қатар «Абай сирек басылымдар беттерінде»; «Жергілікті өлкетану тарихындағы Абай дәуірі»; «Абай мұрасы – адамзаттың баға жетпес қазынасы» және «Абай шығармаларының аудармалары» атты бөлімдерге құнды кітаптар қойылған. Яғни Абайдың еңбектері ғана емес, ақын туралы кітаптар мен оның шығармаларының аудармалары да жинақталған. Мысалы, Құлмат Өмірәлиевтің «Абай афоризмі» атты туындысы ең көп оқылған кітаптар қатарында тұр. Сол тәрізді Абайдың өзбек, мадьяр және қытай тілдеріне аударылған еңбектері де ұсынылған.
Сирек басылымдардың ішінде Семей Орыс Географиялық Қоғамы бөлімінің жазбалары мен есептері, ауылшаруашылық шолулары, түрлі жылдардағы естелік кітапшалар қойылған. Көрме Семей қаласы мен Абай кітапханасының тарихымен, қаланың алғашқы өлкетану мекемелерінің қызметімен және саяси қуғын көргендердің жұмыстарымен таныстырады.
Мұнымен қоса танымдық, тағылымдық мәні зор көрмеде В.Белослюдовтің «Этнография туралы материалдар», Н.Коншиннің «Қырғыз шұбарына ескерту», «Семей облысына ауылшаруашылық шолуы», «Семей облысының мемориалды кітабы», «Семей аймақтық мәлімдемелері» және еліміздің тарихына арналған басқа да ерекше басылымдар ұсынылған. Олардың беттерінде осы мекемелердің қызметі және Абайдың қоғамдық қызметі туралы мәліметтер де тыңғылықты жинақталған.
— Біз осы шара арқылы оқырмандарға Абай әлемін кеңінен ашып, толығырақ танытуды мақсат тұттық. Атап айтсақ, Абай қандай кітаптар оқыды, Абай туралы не жазылды — осының бәрі біздің бүгінгі көрмеде айтылып отыр, — дейді бұл ретте бізге пікір білдірген облыстық Абай атындағы кітапхананың ақпараттық-библиографиялық қамтамасыз ету бөлімінің жетекшісі Жанагүл Мынжыбаева.
Шара барысында студенттер қауымына Абай заманы, оның арман-мұраты туралы деректі фильм де көрсетілді.
Жиынға арнайы шақырылған құрметті қонақтар — этнограф, шежіреші Молдабек Жанболатов пен тарихшы Амантай Исин сынды ғалымдар Абай әлемі туралы көпшілік алдында келелі пікір білдіріп, аталмыш шараның маңызды жайында кең көлемде сөз қозғады.
Әлібек КЕМЕЛХАН, «Семей таңы»{jcomments off}
