Шығыс Қазақстан облысының әкімі Даниал Ахметовтің бастамасымен «Рухани жаңғыру» бағдарламасы аясында 2018 жылдан бастап Абай кітап-ханасында «Абай әлемі» сериясымен кітаптар топтамасын шығару жобасы жүзеге асырылып жатыр. Мақсаты – Қазақстанның мәдениеті мен әдебиетінің дамуына ықпал ету, туған өлкемізден шыққан ұлы тұлғаларымыз бен танымал ақын-жазушылардың туындыларын қайта жаңғырту.
Жобаны жүзеге асыру 2018-2022 жылдар аралығына жоспарланған. Ақын-жазушылардың шығармаларын бағалау және жариялау жөніндегі кеңеске жазушы, КСРО Жазушылар одағының мүшесі, Қазақстан Жазушылар одағының мүшесі, «Құрмет» орденінің иегері Медеу Сапаұлы Сәрсеке жетекшілік етуде.
Жоба аясында жыл сайын жаңа кітаптар шығарылып, оқырман қауым жаңа есімдермен танысып келеді. 2018 жылы жобаның алғашқы сериясына 38 миллион теңгеден астам қаражат бөлініп, 13 689 дана кітап жарық көрсе, 2019 жылы 20 миллион теңге қарастырылып, 6500 тираж кітап шығарылды.
Биылғы жылдың соңына дейін «Абай әлемі» кітаптар топтамасының аясында 23 000 дана тиражбен 22 кітап шығару жоспарлануда. Үшінші серияның жалпы құны 51 миллион теңгеден асады.
– Біздің жобаның мақсаты – жергілікті жазушыларды насихаттау. «Абай әлемі» кітап сериясының редакциялық алқасы мүшелерінің келісімі бойынша, бас редактор Медеу Сәрсеке жетекшілігімен биыл еліміздегі жазушылардың шығармалары жарық көреді деп күтілуде. 22 кітаптың әрқайсысы 2000 дана көлемінде шығарылады. Олардың қатарына Абай шығармашылығын зерттеушілердің жинақтары, хакім ізбасарларының шығармалары, сонымен қатар Абай шығармаларының ағылшын тіліндегі нұсқалары және жеке авторлардың кітаптары кіреді,- дейді Абай кітапханасы директорының орынбасары Гүлмира Нұғыманова.
Бүгінде Абай кітапханасы өз жұмысын қашықтықтан жалғастыруда. Кітапхана қызметкерлері виртуалды көрмелерді, лекцияларды және басқа да шараларды әлеуметтік желілерде онлайн – режимде өткізуде.
Өз тілшіміз {jcomments off}
