Өткен аптада қалалық әкімдікте «Тұрғын үй — коммуналдық шаруашылық ҚАЗ орталығы» акционерлік қоғамының басқарма төрағасының орынбасары мен облыстық энергетика және тұрғын үй — коммуналдық шаруашылығы басқармасы басшысының қатысуымен жиын өтті. Жиында көп қабатты тұрғын үйлерді жалпы үйге арналған есептеуіштермен қамту мәселесі қаралды.
Жиында айтылғандай, жалпы үйге арналған есептеуіштерді орнату көрсетілетін қызметтің сапасын арттырып, сол арқылы азаматтардың секторға деген сенімін ұлғайту үшін маңызды. Үйге ортақ есептеу құралдарын орнату — елдегі цифрландыруды дамытудың міндетті шарттарының бірі.
Қалалық ТҮКШ және тұрғын үй инспекциясы бөлімі мамандарының ұсынған мәліметтері бойынша, Семейге 1300-ге жуық осындай құрылғы қажет. Алайда тұрғындар бұл құрылғыларды сатып алуға асықпайды, өйткені көптеген пәтерлерде жеке есептегіштер бар. Ал бұл, жеке есептегіштерден бөлек, жалпы үйге арналған құрылғы.
Бүгінгі таңда жылумен жабдықтауды есепке алу аспаптарын орнату қажеттілігі 1 165-ті құраса, 100% жабдықтау үшін 490 миллион теңге қажет. Сондай-ақ сумен қамтуды есептеу үшін 1000 дана аспап орнату қажет. Бүгінгі дейін 697 құрылғы орнатылған. Оның 297-сін GSM модемі арқылы деректерді беру үшін жаңғырту қажет. Бұған 101 120 теңге қаражат керек.
«Тұрғын үй — коммуналдық шаруашылық ҚАЗ орталығы» акционерлік қоғамы басқарма төрағасының орынбасары Руслан Кулов қазіргі уақытта көп қабатты үйлерді ортақ есептегіш құрылғылармен қамту мәселесі Семейде ғана емес, жалпы елімізде өзекті болып отырғанын атап өтті. Оның айтуынша, бұл — цифрландыруды дамыту тетіктерінің бірі. Заманауи есептеу құралдары «Е» шаңырақ базасына деректерді қашықтан автоматты түрде беру механизмімен жабдықталған. Жалпы үйдегі жылуды есептегіштер тиімді болғандықтан, тұрғындар тарапынан қызығушылық байқалса, сумен жабдықтау есептегіштеріне келгенде бәрі басқаша. Бұл есептегіштерді орнатуға қызмет көрсетуші қызығушылық танытып отыр.
– Бүгінгі күні бізде екі механизм бар: қаржылық лизинг және несиелеу. Кредит беру кепілге мүлік талап етеді және мұнда негізінен табиғи монопогиялар субъектілері қаржы лизингі бойынша көбірек жұмыс істейді. Яғни біз табиғи монополиялар субъектілерінен техникалық сипаттамасын аламыз. Соның негізінде мемлекеттік сатып алуларды өткіземіз, — дейді «Тұрғын үй — коммуналдық шаруашылық ҚАЗ орталығы» АҚ басқарма төрағасының орынбасары Руслан Кулов.
Кәсіпорын үйге ортақ суды есептеу құралғыларын өздігінен орнатуға дайын, бірақ мемлекеттің көмегі қажет. Тұрғын үй коммуналдық шаруашылығы ҚАЗ орталығы өкілі бұл мәселенің пысықталып жатқанын және қазір нормативтік құқықтық актілерге тиісті өзгерістер енгізу бойынша ақпарат дайындалып жатқандығын айтты.
— Қазір бізде 700 есептеу құралы бар. 300-ін инвестициялық бағдарлама есебінен, ал 400-і Еуропалық қайта құру және даму банкі есебінен орнатылған. Дегенмен барлық құралдар «Семей Водоканал» МКК балансында. Барлық есептегіштер үйге ортақ, тариф бойынша қызмет көрсетеміз. 1 000 есептеуішке жеткізу үшін біз тағы 300 құрал сатып алуымыз керек. Оларды орнату үшін Энергетика басқармасынан бұл есептеу құралдарын инвестбағдарламаға жаңа тарифтен немесе несие қаражаты есебінен енгізуге қолдау көрсетуін сұраймыз, – деді «Семей Водоканал» МКК директоры Еркін Сағындықов.
Кездесуді қорытындылай келе, Руслан Кулов жалпы үйге арналған есептеу құралдарын орнату экономикалық жағынан тиімді екенін халыққа түсіндіру қажет екенін атап өтті. Сондай-ақ, Су кодексіне сәйкес, көп пәтерлі тұрғын үйлердегі судың пайдаланылуын ортақ есепке алу құралдары арқылы есептеу міндетті. Оның айтуынша, бүгінгі таңда республика бойынша үйлердің аталмыш аспаптармен жабдықталуы 75%-ды құрайды. Биылғы міндет — көрсеткішті 84%-ға дейін жеткізу, ал 2025 жылға дейін толық орнату жоспарланып отыр.
Абылай МАҚСҰТБЕК, «Семей таңы»{jcomments off}
