Қала әкімі Бақытжан Байахметов таңғы рейд барысында қызметтердің жолдарды қысқы уақытта күтіп ұстауға дайындығын тексерді. Семейде қар жауып, көшелерде көктайғақтың алғашқы белгілері байқалды.
Жолдарға құм себуге 4 техника жұмылдырылды. Инертті материалдар, ең алдымен, көпірлер айналасындағы еңістер, айналма учаскелерге себіледі. Қар жауған кезде 14 арнайы машина жұмыс істеуге дайын.
Қала әкімі бұл жұмыстар барысында жолдардағы көктайғақ пен мұзбен күресу үшін аса тиімді арнайы реагенттерді пайдалануды тапсырды. Мұндай арнайы химиялық қоспалар Қазақстанда өндірілмейді, олар Ресейден әкелінеді. Орташа бағасы тоннасына 200 мың теңгені құрайды.
Рейд барысында қазылған бірнеше жол учаскелері қаралды, онда әр түрлі коммуналдық қызметтер авариялық жұмыстар жүргізуде. Қала басшысы бұл учаскелерді тиісті тәртіпке келтіруді тапсырды. Қазіргі күні зауыт жұмысының тоқтатылуына байланысты бірнеше апта бойы қалада болмаған павлодарлық битум қайтадан Семейге жеткізіле бастады.
Басқа да бірқатар қалалық қызметтердің жұмысына кемшіліктер айтылды. Мысалы, жол бойында жарықтандыру тіректерін орнатқаннан кейін кесілген бұтақтар уақтылы жиналмайды. Бұған «Горсвет» ЖШС және Біріккен энергетикалық сервис компаниясының мамандары жауап береді.
Шаһар басшысы саябақтар мен скверлердің жағдайымен де танысып шықты. Жеңіс алаңында бірнеше шамдар жанбай тұр. «Зеленстрой» ЖШС басшылығы жарықтандыру құрылғыларының жұмысына энергетиктер жауап беретінін айтты. Бірақ мұндай жауап әкімді қанағаттандырмады.
— Біреулері ағаштарды суаруға, екіншілері орындықтарды бояуға, үшінші мекеме жарықтандыруға жауапты болғаны дұрыс емес. Саябақтарды күтіп ұстауға сұраныс тек бір мекемеден болуы керек – бұл «Зеленстрой» ЖШС. Аталған жұмыстарды атқару үшін мекемеде барлық құралдар бар, сондықтан парктер аумағындағы ақаулар үшін басқаларға сілтеген жөн емес, — деп атап өтті Бақытжан Байахметов.
Жеңіс монументіндегі сынып қалған мәрмәр плиткаларына да назар аударылды. Осы мәселе бойынша қала тұрғындары бірнеше рет әкімнің жеке блогына да жазған еді. Бұл плиталар кеңес заманында арнайы өндірілгені белгілі болды. Мәрмәр плиталардың қалыңдығы мен пішіні стандартты емес, мұндай өнімдер қазір еш жерде шығарылмайды. Қазіргі уақытта сәйкес мәрмәр плиталарды іздеу бойынша шаралар қабылдануда.
Жамақаев көшесіндегі саябақта воркаут спорт алаңының тақталарының болттары шешіліп алынған. Уақыт өте келе тақталардың өздері жоғалып кетуі мүмкін. Мұндай арнайы спорт аймақтарында тіпті кішкентай кемшіліктер де спортпен шұғылданатын азаматтар үшін ыңғайсыздық тудырады. Әкімнің тапсырмасынан кейін бұл кемшілік жойылды.
72-ші квартал аумағындағы скверде шамдардың тіректерін және ағаштарды бояу қажет. Бұл — тұрғындардың демалатын орны, сондықтан адамдарға ыңғайлы болуы үшін барлық жағдай жасалу керек.
Шмидт көшесіндегі жағалаудағы саябақта балмұздақ сатушылар мен велосипедтерді жалға алу мәселесін шешу қажет. Мұздатқыштардың бірнеше метрге созылған электр сымдары көбінесе қолмен қосылады. Бұл өз кезегінде демалушылар үшін қолайсыздықтар туғызады. Өрт қауіпсіздігі нормалары да сақталмайды.
Велосипедтерді жалға беру кезінде арнайы велосипед жолақтарының болмауына байланысты велосипедшілер мен серуендейтін адамдар арасында жиі қақтығыстар да болады. Қала әкімі аталған мәселені реттеу үшін ұсыныстар дайындауды тапсырды.
Таңертеңгі рейд барысында қаралған тағы бір нысан — Әуезов алаңы мен «Абай жолы» аллеясы. Қала тұрғындары уақытында ауыстырылғанына қарамастан, алаң бойындағы шамдар жиі жанып кететінін байқады. Жарықтандыруды реттеу және жер астындағы сымдарды төсеу кезінде сапасыз материалдар қолданылғаны белгілі болды. Бұл мәселе жан-жақты зерделеніп, тиісті ұсыныстар әзірленетін болады.
Таңғы рейд қорытындысы бойынша қала әкімі бірқатар тапсырмалар берді. Жол қызметтеріне қарды уақтылы тазарту және оның жолдарда жиналуына жол бермеу тапсырылды. Қар көп жауған кезде техника күндіз де, түнде де жұмыс істеуі керек.
Саябақтар мен скверлер бойынша келесі жылға күтіп-ұстау жөнінде ұсыныстар дайындау тапсырылды. Соның ішінде көшет отырғызу, ағаштарды суару, орындықтарды сырлау, тротуар жолдарын жөндеу және жаңарту жұмыстарын қарастыру керек.
— Қалада тұрғындардың жайлы демалуы үшін саябақтар мен скверлер жеткілікті. Сіздің міндетіңіз — адамдарға жақсы жағдай жасау. Келесі жылғы жоспарда барлық қажетті жұмыстарды қарастыру керек. Қаржыландыру тұрғысынан қажетті қаражат салынады. Содан кейін сіздерден қатаң сұраныс болады, — деді Бақытжан Байахметов.
Өз тілшіміз
