Семей қаласының әкімі Бақытжан Байахметов азаматтарға жеке қабылдау өткізді.
Қабылдауға келген азаматтардың бірі — Семей қаласының тұрғыны Зейнепхан Искакова Семей қаласы әкімдігінің халықты жұмыспен қамту орталығында 2020 жылғы 3 шілдеден бастап жұмыссыз ретінде тіркелген. Өткен жылдың қаңтар айынан бастап желтоқсан айының соңына дейінгі мерзімге «Теплокоммунэнерго» мекемесіне қоғамдық жұмысқа жіберіліп, халықты жұмыспен қамту орталығынан ай сайын 60 000 теңге мөлшерінде еңбекақы алып отырды. Алайда кейіннен оның 2021 жылдың 11 мамырынан бастап қазіргі уақытқа дейін «INVIVO» ЖШС-де еңбек шарты бойынша жұмыс істейтіндігі анықталды. Бұл ретте 2016 жылғы «Халықты жұмыспен қамту туралы» заңның бұзылуына жол беріліп отыр. Аталған заңға сәйкес, жұмыссыз азаматтар бес жұмыс күні ішінде халықты жұмыспен қамту орталығына (тұрақты, уақытша жұмысқа, азаматтық-құқықтық сипаттағы шарттар бойынша жұмысқа орналасуды қоса алғанда) жұмыссызбен жұмыс істеу тәртібіне әсер ететін өзгерістер туралы мәліметтерді уақтылы беруге міндетті.
Осы құқық бұзушылықтарға байланысты Зейнепхан Искакова 11.05.2021 — 01.11.2021 аралығындағы кезеңде төленген 337 225,77 (үш жүз отыз жеті мың екі жүз жиырма бес) теңге 77 тиын мөлшеріндегі жалақыны мемлекет кірісіне қайтаруға тиіс. Халықты жұмыспен қамту орталығы Семей қалалық сотына заңсыз төленген соманы өтеу туралы арыз берді.
Кәмелетке толмаған баласы бар жалғыз басты ана қала әкімінен осы жағдайға байланысты көмек сұрады. Жеке қабылдауда берешекті біртіндеп, ай сайын 3 мың теңгеден өтеу туралы келісімге қол жеткізілді.
Қабылдауға келген келесі тұрғын — Эльвира Смаилова әкімге көп қабатты тұрғын үйдің заңсыз салынып жатқанын айтып шағымданды. Тұрғын үй Ертіс көшесіндегі 17-үйдің автотұрақ орнында салынуда. Айта кетсек, осыған дейін жүргізілген мониторинг барысында және аталған үйдің тұрғындарының өтініші бойынша тексеру жүргізген сәулет және қала құрылысы бөлімі көп қабатты тұрғын үй құрылысын «Виктория 13» ЖШС рұқсат құжатынсыз салып жатқанын анықтаған болатын. Тиісті хат өткен жылдың қараша айында «ШҚО мемлекеттік сәулет-құрылыс бақылау басқармасы» мекемесіне жіберілген.
Биылғы жылдың 13 қаңтарындағы жоспардан тыс тексеру нәтижелеріне сәйкес, «Виктория 13» серіктестігіне қатысты анықталған құқық бұзушылық фактілері бойынша әкімшілік іс жүргізу қозғалды. Сондай-ақ анықталған құқық бұзушылықтарды жоюға, дәлірек айтқанда, құрылыс жүргізіліп жатқан жер телімінің нысаналы мақсатын сәйкестендіруге ұйғарым берілді.
Әкімнің жеке қабылдауында құрылыс салушыдан қысқа мерзімде рұқсат құжаттарын жөнге келтіру талап етілді. Олай болмағанда, нысанның құрылысы тоқтатылады.
Ал Гүлнар Проскурина есімді қала тұрғыны 2-топтағы мүгедек қызы — №10 мектептің үйден оқитын оқушысы Іңқәр Нұрланқызын Нұр-Сұлтан қаласына қайта емдетуге апаруға және дәрі-дәрмек пен азық-түлік алуға қаржылай қолдау көрсетуді сұрап келіпті. Бұған дейін Гүлнар Проскуринаның 60 000 теңге мөлшерінде біржолғы әлеуметтік көмек көрсету туралы өтініші қабылданған болатын. Сонымен қатар халықты жұмыспен қамту орталығы азаматшаны «Халық қайырымдылық қорынан» қосымша көмек алуға тізімге енгізіп, 50 кг азық-түлік берілген.
Жеке қабылдауда Гүлнар Проскурина №30 бағыттағы қоғамдық көліктің жұмысына шағымданды. Қала әкімі Бақытжан Байахметов жолаушылар көлігі және автомобиль жолдары бөліміне, 14-ші шағын ауданға қосымша бағыттар қосу мүмкіндігін қарастыруды тапсырды.
Бұл күні әкімнің қабылдауында болған төрт баланың анасы Әсем Думанбекова жеке үйінің ылғалдылығынан балалары жиі ауыратынын айтып, уақытша тұруға жайлы тұрғын үй берілсе деген өтінішін жеткізді. Әсем Думанбекова тұрғын үй кезегінде өткен жылдан бері тұр. Қала әкімі тұрғын үй-коммуналдық шаруашылық және тұрғын үй инспекциясы бөліміне құрылыс бөлімінің мамандарымен бірге Әсем Думанбекованың мәселесін шешуге көмек көрсетуді тапсырды.
Зейнеткер Камал Кабышева қала басшысынан пешпен жылытылатын үйін көп қабатты үйдің 2 бөлмелі пәтеріне ауыстыруға қолдау көрсетуді сұрады. Зейнеткердің мәселесі тұрғын үй заңнамасы аясында шешілетін болады.
Семей қалалық ішкі саясат бөлімі
