ШҚО-да онкологияға қарсы онкүндік басталады. Бұл туралы ШҚО ӘМСҚ баспасөз қызметі мәлімдеді.
Обырға қарсы дүниежүзілік күрес күні аясында және онкологиялық аурулардың алдын алу жөніндегі кешенді жоспар аясында 1-10 ақпан аралығында Қазақстанның барлық өңірінде онкологиялық аурулардың алдын алуға арналған онкүндік өтеді.
Онкүндік мақсаты — онкопатология ауыртпалығын төмендету жөніндегі жаһандық мәселеге қоғамның назарын аударту, медицина қызметкерлерінің онкологиялық аурулардың алдын алу және ерте анықтауға қатысты білімін арттыру, халықты скринингтік тексерулер туралы ақпараттандыру.
Бұл шара ШҚО Көпсалалы онкология және хирургия орталығында ақпараттандыру акциясы ретінде өтеді. Акция аясында ең алдымен бұқаралық ақпарат құралдары өкілдері үшін облыстағы онкологиялық ахуалға қатысты баспасөз-конференциясы ұйымдастырылады. Орталықтың әлеуметтік желідегі ресми парақшаларында онкологиялық қырағылықты қалыптастыруға байланысты дәрігерлермен тікелей эфирлер ұйымдастырылады.
Осы он күн ішінде облыстың бұқаралық ақпарат құралдарымен тығыз қарым-қатынас орнатып, аймақ жұртшылығына барынша пайдалы, әрі қажетті ақпаратты тарату көзделіп отыр.
Ал ақпан айының 5-і күні сағат 9.00-ден 13.00-ге дейін ШҚО Көпсалалы онкология және хирургия орталығында обырды ерте анықтауға бағытталған Ашық есік күнін өткізу жоспарланған.
«СТ» — ақпарат
