Облыс мектептеріндегі қазақ тілі пәнінің мұғалімдері біліктілікті арттыру курстарынан өтетін болды. Бұл оқушылардың білім сапасының артуына, мемлекеттік тілді оқып, үйренуге де оң ықпал етпек.
Аймақ басшысы Даниал Ахметов қала және аудан әкімдерімен, басқарма басшыларымен жиын өткізіп, білім, медицина салаларына қатысты бірқатар мәселелерді талқылады.
– Жуырда орыс мектептеріндегі қазақ тілі және қазақ мектептеріндегі орыс тілі мұғалімдері тестілеуден өтті. Өкінішке қарай, барлық ұстаздар жақсы нәтиже көрсеткен жоқ. Сондықтан педагогтардың көпшілігі С.Аманжолов атындағы ШҚМУ базасында біліктілікті арттыру курстарынан өтіп, қазақ тілін оқытудың жаңа әдістемесін меңгереді. Біздің негізгі мақсатымыз – оқушыларды мемлекеттік тілде еркін сөйлеу деңгейіне жеткізу. Ата-аналар маған балаларының қазақ тілін үйренгісі келетіні туралы жиі жазады», – деді облыс әкімі.
Аймақ басшысының айтуынша, көптілділік бағдарламасы аясында оқушылар ағылшын, француз және неміс тілдерін үйренуде жақсы жетістіктерге қол жеткізуде. Десе де, қазіргі таңда бірінші кезекте мемлекеттік тілге ерекше назар аудару керек.
Жиын барысында сондай-ақ өзге де бірқатар сұрақтар, соның ішінде денсаулық сақтау саласына қатысты мәселелер қаралды.
– Өңірде 56 медициналық мекеме PACS жүйесіне қосылған. Бұл науқастарға диагноз қоюға мүмкіндік беретін жасанды интеллект. Қазірдің өзінде 84 мың зерттеу жүргізілді. Ең бастысы, жүйе пациенттерді әр түрлі клиникаларға баруға мәжбүр етпей, уақытты да үнемдейді. Жүйенің ішінде барлық тест нәтижелері, рентген және МРТ суреттері және басқалары сақталған. Өткен жылы біз азаматтардан 46 мың өтініш алдық. Талдау олардың негізінен әлеуметтік салаға, ТҮКШ, агроөнеркәсіптік кешен проблемаларына және бизнесті дамытуға қатысты екенін көрсетті, – деп атап өтті облыс әкімі.
Аймақ басшысы қала және аудан әкімдеріне әрбір өтінішке уақтылы және толық жауап беруді тапсырды. Әсіресе, шаруалардың өтініштері жерде қалмай, тиісті шешімін табуы қажет. Сондай-ақ жайылымдық жерлерді бөлу мәселесі де талқыланды.
– Өткен жылы біз фермерлерге өте қажет жайылымдық алқаптарға пайдаланылмаған және бос жерлерді қайтаруды бастадық. Бұл жұмыс жалғасатын болады, – деді аймақ басшысы.
Азамат ЕРСАЙЫН,
«Семей таңы»
