ШҚО әкімі Даниал Ахметов апта сәрсенбісінде Семей қаласына жұмыс сапарымен келіп, қалалық әкімдікте жиын өткізді. Жиын барысында бірқатар өзекті мәселелер қаралды, соның ішінде «Сергек»фото және бейнетіркеу жобасын іске асыру барысы талқыланды.
Жиналыс барысында «Сергек» жүйесі жаз айының ортасынан бастап іске қосылатыны айтылды.
«Көркем Телеком» ЖШС басшысы, «Сергек» жобасының авторы Әсет Ахметовтің айтуынша, жүйені 1 шілдеден бастап іске қосу жоспарланып отыр.
— Маусым айында жұмыстың басым бөлігін аяқтауды жоспарлап отырмыз, бұл көше кешендері, жол кешендері және жалпы бейнебақылау камералары. Орнатылған кешендер қазір жұмыс істеп тұр. Қазіргі уақытта бізде 12 жол кешені орнатылған. Сондай-ақ ахуалдық орталық пен деректерді өңдеу орталығы орналасатын жер анықталып, жөндеу жұмыстары жүргізілуде. Проблемалы жерлерге 74 жалпы бейнебақылау камералары орнатылады. Барлық жұмыстар кестеге сәйкес атқарылуда. Сынақтық пайдалану қазірдің өзінде басталды, ол барлық қамтамасыз ету бағдарламаларын жүз пайыз пайдалануға мүмкіндік береді, – деп мәлімдеді Әсет Ахметов.
Жиында айтылғандай, қалада 616 камера 74 желілік учаскеде және 40 адам көп шоғырланған қиылыста орнатылады. Және тағы 687 сыртқы бейнебақылау камерасы қосымша жұмыс істейтін болады. Әзірге жабдық орнатылған жерде ол тест режимінде жұмыс істеуде. Әлеуметтік және бизнес нысандардағы барлық камералар да «Сергек»жүйесіне біріктіріледі. Маусым айында аппараттық-бағдарламалық кешендер толық күшіне енеді, қала тұрғындары үшін «109»анықтама қызметі қолжетімді болады.
Аймақ басшысы Даниал Ахметов өз кезегінде жобаны жүзеге асырудың тиімділігін, сондай-ақ «Сергек» жүйесінің автобус маршруттары бағдарламасымен кіріктірілуінің маңыздылығын баса атап өтті.
Жиын барысында сонымен қатар ШҚО әкімі қаладағы колледж ғимараттарын мемлекеттік ведомстволарға берілетіні туралы ақпараттарға қатысты түсініктеме берді.
— Мен бірқатар мемлекеттік қызметтерді немесе ұйымдарды орналастыру үшін кейбір колледж ғимараттары босатылады деген қауесеттерді естідім. Менің айтарым, бұл әзірше бос сөздер. Бірде-бір мектеп, бірде-бір колледж ғимараты босатылмайды. Бізде қалада бос орынжайлар көп. Бизнестің өзі орналастыру үшін 37 мың шаршы метр бос алаң бере алады, — деді Даниал Ахметов.
Бұған дейін облыстық білім басқармасы да алаңдауға негіз жоқ екенін айтқан болатын.
— Қазіргі уақытта жаңа Абай облысының құрылуына байланысты білім басқармасымен Семейдегі колледждердің материалдық-техникалық базасына талдау жүргізілді. Мониторингке байланысты осы қауесеттер басталды. Колледждерді жабу немесе оларды біріктіру мәселесі қарастырылмайды. Студенттер өздері таңдаған мамандықтары бойынша дипломдарын алады. Семейдегі барлық колледждер облыста ғана емес, республика көлемінде сұранысқа ие кадрларды дайындайды. Студенттер мен ата-аналарына алаңдауға негіз жоқ екенін айтқым келеді, – деп жауап берген болатын облыстық білім басқармасының басшысы Сайрангүл Жұмаділова.
Әлібек КЕМЕЛХАН,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
