Шығыс Қазақстан облысында осы жылы 7510 түлек ҰБТ тапсырады. ШҚО Білім басқармасының мәліметіне сүйенсек, ағымдағы 2022 жылы аймағымыз бойынша 8859 оқушы мектеп бітіреді.
Оның ішінде 7510 түлек, яғни 84 пайызы, Ұлттық бірыңғай тестілеуге қатыспақ. Балалар тестілеуге қатысу үшін тестcenter.kz сайтында өтінім берді.
Білім басқармасы басшысы Сайрангүл Жұмаділованың айтуынша, облыста Өскемен, Семей қалаларында және Катонқарағай ауданы Үлкен Нарын ауылында ҰБТ өткізілетін үш пункт бар. Тестілеу 16 мамырда басталып, 5 шілдеге дейін жалғасады. Түлектер үш міндетті және екі бейінді пән бойынша сұрақтарға жауап береді. Жалпы, тестілеуде 120 тапсырма болады. Түлек ең көбі 140 балл жинай алады.
«Биыл мемлекеттік грантқа үміткерлерге ҰБТ-ны екі рет тапсыруға мүмкіндік беріліп отыр. Ал оқуға түскен кезде ең жоғары балл жинаған сертификатты көрсетеді. Биыл облыстық бюджеттен 450 грант бөлініп отыр. Оның 60 пайызы техникалық мамандықтаға болса, қалғаны медицина, білім, ветеринария сынды салаларға», – деді бұл жайында пікір білдірген Сайрангүл Жұмаділова.
Динара НҰРЛЫБЕКҚЫЗЫ,
«Семей таңы»
