Семей қаласының әкімі Бақытжан Байахметов азаматтарды жеке сұрақтары бойынша қабылдады. Бұл жолғы қабылдауда Шығыс кентінің тұрғындары болды. Қабылдауға келген азаматтар, негізінен, әлеуметтік мәселелерді көтерді.
Қабылдауға алғашқы болып келгендердің бірі Айнұр Иманғалиева қызының жұмысқа орналасуына көмек көрсетуді сұрады. Қызы облыс әкімінің гранты бойынша білім алған. Оқу орны оның қызына тек облыс орталығынан жұмыс іздеуі керектігін айтқан. Бірақ олар Семей қаласында тұрады.
Бақытжан Байахметов жоғарғы оқу орнының түлегіне туған қаласында жұмысқа орналасуына көмек көрсетуге уәде берді.
Қала әкімінің көмегіне жүгінген І топтағы мүгедек Зәуреш Әубәкірова 30 жыл бойы пәтер жалдап тұрады. Қызы мен немерелері бар. Баспана кезегінде 2014 жылдан бері тұр, кезек нөмірі – 882. Зәуреш Әубәкірова жақын арада тұрғын үйге қол жеткізе алмайтынын айтып, әкімнен баспана мәселесін шешуге көмек көрсетуді өтінді.
Қала басшысы өтініш берушіге, заңнамаға сәйкес, жалдау ақысын субсидиялауға Отбасы банкіне құжаттар тапсыруға ұсыныс жасап, тұрғын үй инспекциясы бөліміне құжаттарды рәсімдеуге, сондай-ақ қолайлы тұрғын үйді іздестіруге көмек көрсетуге тапсырма берді. Жалдау ақысының жартысын мемлекет өтейді.
Чернобыль ардагері Т.Нүрпейісов қызымен және немерелерімен бірге жеке сектордағы үйде тұрады. Ол пәтер сатып алуға көмек көрсетуді сұрап келді. Тұрғын үй кезегінде 2018 жылдың ақпан айынан тұр, кезек нөмірі – 2326. Т.Нүрпейісов осыған дейін өзіне ұсынылған жатақхана бөлмесінен бас тартқан.
Қала әкімі тұрғын үй инспекциясына екі баласы бар қызын «Толық емес отбасы» санаты бойынша есепке қоюға көмек көрсетуді тапсырды. Чернобыль ардагеріне Отбасы банкінде қажетті құжаттарды ресімдеу қажет. Сол кезде жаңа тұрғын үй алу әлдеқайда жылдам болады.
Шығыс кентінің тұрғыны Гаухар Мүслимова тұрғын үйге кезекке қою мәселесін шешіп беруді сұрады. Оның әкесі — Ұлы Отан соғысының ардагері тұрғын үй кезегінде тұрған. Бірақ 2011 жылы қайтыс болды. Заң бойынша, ол қайтыс болғаннан кейін пәтер алу құқығы жұбайына және балаларына ауысуы керек болған. Алайда кейбір себептерге байланысты майдангердің әйелі мен балалары отбасы құрамына кірмеген. Ал оның жұбайы — 97 жастағы Шәрипа Мүслимова 1358 нөмірімен басқа кезекте тұр. Шәрипа Мүслимова жарына тиесілі пәтерді алуға тиіс болатын.
Қала әкімі Гаухар Мүслимовға тұрғын үй комиссиясына өтініш жазуды ұсынды, тұрғын үй алу мәселесінде әділдікті қалпына келтіру үшін барлық құжаттарды тапсыру қажет.
Мәкен Давлетчина Шығыс сол жақ кентінде тұрады. Онда су құбыры болмағандықтан, 5 шақырым жерде орналасқан құдықтан су алуға мәжбүр екенін айтады. Сондай-ақ ол кенттегі дүкендерді зейнеткерлер мен көп балалы аналар үшін әлеуметтік маңызы бар тауарлармен қамтамасыз етуге көмек көрсетуді сұрады.
Азаматшаға қазіргі күні әзірленіп жатқан Шығыс оң жақ және Шығыс сол жақ саяжай алаптарының егжей-тегжейлі жоспары туралы түсініктеме берілді. Қаланың бас жоспарына өзгерістер енгізілгеннен кейін сумен жабдықтау желілерін салу жобасын әзірлеу мәселесі қаралады.
Ауыз су тапшылығы мәселесі өткір тұрғандықтан, блокты-модульді жүйе орнату мәселесін қарастыруға тапсырма берілді. Арнайы жұмыс тобы мәселені зерттеу үшін аталмыш аумаққа барады.
Қала әкімі сондай-ақ тиісті мамандарға зейнеткерлер мен көп балалы аналарға арналған әлеуметтік маңызы бар азық-түлік бойынша есеп дайындауды тапсырды. Бұл тауарлар тиісті куәліктерді көрсеткен тұрғындарға саудаланатын болады.
Водный кентінің белсенділері Айгүл Қанафина, Гүлнар Малчибаева және Валерия Кәкенова кенттің егжей-тегжейлі жоспарына қатысты өтініштерін білдірді.
Восход және Водный кенттерінің «Жұмыс кенті жылу электр алабы-3» егжей-тегжейлі жоспарлау жобалары қаланың бас жоспары негізінде белгіленген тәртіппен әзірленіп, бекітілген. Жоспарлау жобасына сәйкес, Водный кентінде 4 жалпы білім беретін мектеп пен 5 балабақша салу көзделген. Қазіргі таңда білім бөліміне Водный кентінде 600 орындық мектеп салу үшін жер учаскесі берілді. Сонымен қатар балабақша салуға да жер телімі белгіленген.
Восход кентінде қазіргі уақытта № 34 мектеп жұмыс істейді, 230 орындық балабақша құрылысы үшін жер телімі қарастырылған.
Биыл Шығыс сол жақ саяжай алаптарын егжей-тегжейлі жоспарлау жобасы әзірленетін болады. Шығыс сол жақ саяжай алабында 1200 орындық мектептің құрылысы аяқталды. Ал инженерлік инфрақұрылым ағымдағы жылы аяқталады. Мектеп жанында 320 орындық балабақша құрылысына арналған жер телімі қарастырылған.
Шығыс оң жақ саяжай алабында 300 орындық мектеп және 140 орындық балабақша құрылысы көзделіп отыр.
Шығыс кентінің егжей-тегжейлі жоспарлау жобасын 2023 жылға әзірлеу жоспарланған.
Белсенділер кентте балалар ойын алаңын, футбол алаңын және автобус аялдамасын салатын орындарды ұсынды. Қала әкімі өзінің орынбасарына жоғарыда аталған нысандарды орналастыруға ыңғайлы болатын жерлерді қарап шығуды тапсырды.
Семей қаласы әкімінің баспасөз қызметі
