ШҚО Санитариялық-эпидемиологиялық бақылау департаментінің аумақтық бөлімшелері ағымдағы жылдың басынан бері ауыз судың микробиологиялық көрсеткіштеріне 221 сынама алып, зерттеу жасады. Зерттеу нәтижесінде 17 сынама гигиеналық нормативтерге сәйкес келмеген.
Санитариялық-химиялық көрсеткіштерге 220 сынама зерттеліп, 10 сынамада сәйкессіздіктер анықталған.
Санитариялық-профилактикалық шаралар жүргізілгеннен кейін қайта зертханалық зерттеулер жасалғанда, ауыз судың сынамалары гигиеналық нормативтерге сай болып шықты.
Тұрғындарды ауыз сумен қамтамасыз етудің негізгі шарты – ауыз судың сапасы мен қауіпсіздігі, яғни микробиологиялық және санитариялық-химиялық көрсеткіштер бойынша гигиеналық нормативтерге сәйкес болуы.
Халыққа берілетін ауыз су сапасына бақылау сумен жабдықтау объектілерінде өндірістік бақылау ретінде және халықтың санитариялық-эпидемиологиялық салауаттылығы саласындағы санитариялық-гигиеналық мониторинг арқылы қамтамасыз етіледі.
Су тасқыны кезеңінде ауыз судың қауіпсіздігіне ерекше бақылау жүргізіледі, бұл шара су сапасының уақытша маусымдық нашарлауының алдын алады. Сумен қамтамасыз етуге жауапты ұйымдар су тасқыны кезеңінде ауыз судың микробтық ластану қаупін төмендету бойынша алдын алу іс-шараларын жүргізеді.
Сөз орайында айта кетелік, бүгінгі таңда облыс аумағында тұрғындар арасында су факторына байланысты инфекциялық аурулар тіркелмеген.
Инабат АБЛАХАТҚЫЗЫ,
«Семей таңы»
