Шығыс Қазақстан облысының дәрігерлері жыл басынан бері науқастарға 500-ден астам жоғары технологиялық ота жасады.
ШҚО Денсаулық сақтау басқармасының мәліметіне сүйенсек, өңірде жыл басынан бері түрлі науқастарға 552 жоғары технологиялық ота жасалған. Бұл былтырғы кезеңмен салыстырғанда біршама көп. Өткен жылы 440 ота жасалған болатын. Медицина мекемелеріне 6 жаңа жабдық сатып алынбақ. Бұл жоғары технологиялық медициналық қызметтердің тағы 14 түрін жүргізуге мүмкіндік береді.
Аймақ басшысы Даниал Ахметовтің айтуынша, қазір 19 дәрігер шетелде біліктіліктерін арттыруда. Алдағы уақытта тағы 54 маманды үздік клиникаларда оқыту жоспарланып отыр. Оның 20-сы — онкогематология саласында тер төгіп жүргендер.
— Сондай-ақ біздің дәрігерлер Нұр-Сұлтан қаласындағы Ұлттық кардиология және нейрохирургия орталығында Юрий Пядан дәріс алады. Ана мен бала орталығында зертханалық зерттеулер жүргізуге мүмкіндік беретін заманауи жабдық орнаттық, — деді өз сөзінде Даниал Кенжетайұлы.
Сөз орайында айта кетелік, соңғы бес жылдың ішінде өңірдің медициналық әлеуетін арттыру мақсатында халықаралық стандарт пен қатаң талап сүзгісіне төтеп беретін үш мыңнан астам заманауи медициналық құрал-жабдық сатылып алынған екен.
Сонымен қатар сатылып алынған жабдықтардың нәтижесінде облысымыз бойынша медициналық техниканың көлемі 2,5 есеге артқан. Мұнымен қатар 200-ден астам жаңа көлік сатылып алынып, жедел жәрдем паркінің автокөліктері жаңартылған болатын.
Әлібек КЕМЕЛХАН,
«Семей таңы»
