Дана халқымыз «Бірінші байлық — денсаулық» дейді. Ал денсаулығымыз дәрігерлердің біліктілігіне, медицина мекемелерінің жабдықталуына тікелей байланысты. Емханалар мен ауруханаларда дұрыс қызмет көрсетіліп, жақсы жағдай жасалуы керек. Бүгінгі таңда Шығыс Қазақстан облысы денсаулық сақтау саласы бойынша өзге өңірлермен салыстырғанда көш басында келеді. Оған себеп те бар: облыстық әкімдік тарапынан, әсіресе аймақ басшысы Даниал Ахметовтің тарапынан аталған салаға зор көңіл бөлініп отырғаны белгілі. Бір ғана мысал: соңғы бес жылдың ішінде өңірдің медициналық әлеуетін арттыру мақсатында халықаралық стандарттар мен қатаң талап сүзгісіне төтеп бере алатын үш мыңнан астам заманауи медициналық құрал-жабдық сатылып алынған екен.
Облыстағы жедел жәрдем паркінің автокөліктері жаңартылып, 200-ден астам жаңа көлік алынды. Бұл күнде әлем денсаулық саласында ядролық медицинамен емдеуді үлкен күшке айналдырып, шарапатын көріп отыр. Өркениеттің көшінен біз де қалмауымыз керек. Шығыс өңірінде диагностика және терапия қарқынды дамып келеді. Мәселен, Семей қаласында радиофармпрепараттар өндіретін, радионуклидтік диагностика мен терапия жүргізуге дейінгі процестерді іске асыратын Ядролық медицинаның бірегей орталығы ашылып, іске қосылды. Радионуклидтік терапия бөлімшесі – еліміздегі теңдесі жоқ жалғыз орталық. Емдеу ісі әлемнің осындай орталықтарымен шендесе алады. Радионуклидтік терапия «емі жоқ аурудың» өзін емдеуге мүмкіндік тудырады. Қаншама науқас ем алып, диагностикалық зерттеулерден өтті. Семейдегі перинаталдық кешенде балаларды оңалту және катамнез орталығына жаңарту, жаңғырту жұмыстары жүргізілді.
Шығыс Қазақстан облысының орталығында маммология мен гинекологияның жансақтау бөлімшесіндегі ота жасалатын блогы жөндеуден өтіп, жаңғыртылды. Республикамызда әзірге баламасы жоқ Гематология орталығының құрылысы жүргізіліп жатыр. Жасушалық әрі гендік-инженерлік технологияларды пайдаланудың ресурсы жоғары.
Медициналық ұйымдардың материалдық-техникалық базасын күшейтіп, жаңғырту мақсатында екі компьютерлік томограф, бірнеше рентген аппараты алынды. Үржар ауданындағы Алакөл көлінің жағалауында фельдшерлік-акушерлік пункт салынды. Мұның барлығы халық сұранысына сай жүзеге асырылуда.
Соңғы жылдары әлемнің көптеген елдерінде тәжірибе жинау, шеберлік шыңдап, білімін жетілдіру ісі де кезең-кезеңімен жүйелі жүргізіліп келеді. 2017 жылдан бастап кардиология, оның ішінде кардиохирургия, инсульт орталықтары, нейрохирургия, медициналық оңалту, онкология, акушерлік және гинекология салалары бойынша Англия, Германия, Польша, Ресей, Италия, Литва, Израиль, Жапония сынды елдердегі алдыңғы қатарлы орталықтарда мамандарымыз тәжірибе алмасып, шеберліктерін шыңдап қайтты. Бұл үрдіс әлі де жалғасуда. Медициналық кадрларды оқыту бағдарламасының аясында бес жыл аралығында бес мыңнан астам медицина қызметкері оқып келді.
Өскемен қаласындағы 1947 жылы облыстық онкологиялық диспансер ретінде ашылып, кейінгі жылдарға дейін Шығыс Қазақстан облыстық онкологиялық диспансер ретінде қызмет атқарып келген емдеу мекемесі 2018 жылдан бастап Шығыс Қазақстан облыстық Көпсалалы онкология және хирургия орталығы деп өзгертілді. Халықтың денсаулығын жақсартуға айрықша көңіл бөліп, тәуекелге бел буудың нәтижесінде медицина мамандары көптеген жетістіктерге жетуде. Орталықтың медициналық құрылғылары да, заманауи жабдықтары да әлемдік стандарттарға сай. Қатерлі ісік патологиясы бар науқастардың сырқатын диагностикалық талдаулар арқылы анықтау және сырқатын емдеу шаралары халықаралық стандарттарға сай жүргізіледі.
Консультациялық-диагностикалық бөлімшеге консультациялық блок, амбулаториялық хирургия орталығы, амбулаториялық химиотерапия кабинеті, эндоскопиялық блок, оңалту блогы қарайды.
Бұрынырақта шығысқазақстандықтардың сырқатын емдетпестен бұрын дәрігердің алдына барып кеңесін алу, диагностикалық зерттеу жүргізу үшін Алматы, Нұр-Сұлтанға сабылғаны рас. Ал қазір жергілікті халық бұрынғыдай табанынан тозбайды, жақын жерден денсаулығын тексерте алады.
Осы күнге дейін науқастар алдын ала жазылып, уақыты келгенде ғана тексерілуге жететін. Енді жағдай мүлде басқаша, қайта пациент өзі қалаған уақытына жазылып, ыңғайлы мерзімде тексерістен өте алады. Қорытындысын арнайы базадан жергілікті дәрігері арқылы шығарып алуына да мүмкіндік қарастырылған.
Шетелдік компаниялардың озық технологиясын сатып алмас бұрын мамандар оқуға жіберіліп, тәжірибе мен шеберліктерін шыңдады. Шет елдерден мамандар келіп, тәжірибелерімен бөлісті. Онкология және хирургия орталығы мамандарының басым көпшілігі шет елдерде білімін жетілдірді. Ертеректе тәжірибе алмасуға дәрігерлер екі апта мерзімге баратын болса, енді 1 — 3 ай аралығында оқуына жағдай жасалып отыр.
Баршамызға белгілі, Мемлекет басшысы Қ.Тоқаев халықтың денсаулығына баса көңіл бөлуді қадап айтып, тапсырмалар жүктеді. Бұл салада әлі де ауқымды жұмыстар күтіп тұр. Мәселен, бүгінгі таңда шығыс өңірінде алдыңғы орында өкпе ауруы тұр. Халықтың денсаулығын бақылау мақсатында скринингтік тексеру жүргізіледі. Тіпті сенбі-жексенбі күндері де Ашық есік күндері ұйымдастырлып тұрады. Жұмыс уақытында келе алмаған жандар осындай Ашық есік күнінде тексерілуіне қолайлы жағдай жасалып отыр.
Әлібек КЕМЕЛХАН,
«Семей таңы»