Шілде айының 10-ы күнгі көрсеткіш бойынша, Шығыс Қазақстан, Абай облыстарында КВИ-ге қарсы вакцинациялаудың бірінші және екінші компонентімен қамту 100 пайызға орындалды, деп хабарлайды ШҚО Санитариялық-эпидемиологиялық бақылау департаменті.
«Аймағымыз бойынша 12-17 жас аралығындағы жасөспірімдер, жүкті әйелдер мен емізетін аналар арасында Pfizer вакцинасының 1-ші компонентімен 110 021 адам егілсе (92,2%), 2-компонентін 108 269 адам алған (90,7%). Соңғы (7 шілдедегі) мәліметтерге сәйкес, облыста 711 462 (89%) адам коронавирусқа қарсы ревакцинациядан (үшінші бустерлік доза) өтті. Ревакцинация жүргізу коронавирустық инфекцияға қарсы иммунитеттің қалыптасуына әсер етеді», — делінген департамент таратқан ақпаратта.
Қазір екі облыста QazVac, Sinopharm, Pfizer вакциналары қолжетімді. Жалпы, Абай және Шығыс Қазақстан облыстарында барлығы 37 635 адам 4-ші ревакцинациядан өткен. Алайда жоспар бойынша 90 649 адам өтуі қажет.
«Өркениетті елдер арасында қайт а ревакцинациялау COVID-19 айналымындағы және жаңа штамдарымен күресудің тиімді шараларының бірі ретінде танылды. ШҚО Санитариялық-эпидемиологиялық бақылау департаменті облыс тұрғындарын COVID-19-ға қарсы вакцина алуға шақырады, соның нәтижесінде біз бәріміз бұрынғы қалыпты өмірге орала аламыз. Вакцинацияның мақсаты – КВИ бойынша эпидемиологиялық жағдайды тұрақтандырып, ұжымдық иммунитетті қамтамасыз ету», — дейді аталмыш ведомство өкілдері.
Ерлан АЙҚЫНҰЛЫ
