Семейде тұрмыстық химия өндіретін зауыт салынады. Сейсенбі күні қала әкімі Айбек Кәрімов пен польшалық «Сан Профи» компаниясының өкіл-дері серіктестік жөніндегі ке-лісімшарт құжатына қол қойыды. Жоспар бойынша жоба уақытылы іске асса, жылдың соңында алғашқы өнім өндіріледі деп күтілуде. Жалпы, заманауи зауыттың қуаты жылына 700 тонна өнім өндіруге қауқарлы. Зауыт кір жуатын ұнтақ, сабын, тазалауға қажетті заттар шығара алады.
Қала әкімі Айбек Кәрімовпен кездесуі кезінде «Сан Профи» компаниясының өкілі Тимур Қайдаров қазіргі таңда Еуропа нарығында тұрмыстық химия өндіру саласында танымал болып отырған компания жайында мәлімет беріп өтті.
— Жоба қуаты жылына 700 тонна өнім өндіре алады. Сәйкесінше, жыл сайын өндіріс көлемі де арта береді. «Сан Профи» компаниясының басты мақсаты – мемлекеттік бағдарламаларға қатысу. Әлеуметтік маңыздылығы жағына тоқталар болсақ, аталмыш жоба тұрғындарды жұмыспен қамтуды көздейді. Мүмкіндігі шектеулі жандардың да бізде жұмысқа тұруына тиімді тұстары бар. Атап айтқанда, екінші және үшінші топтағы мүмкіндігі шек-теулі жандарды жұмысқа тарту жағы қарастырылған. Ал, маркетингте сатыл- ған өнімнің әр данасынан 1 теңге балалар үйінің қажетіне жаратылатын болады, — дейді Тимур Қайдаров.
Польшалық компания өкілдерінің айтуынша, тұрмыстық химия өнімдері алдымен Семей қаласында өндірілетін болады. Қуаты артып, жұмыстары жүретін болса, ШҚО басқада аймақтарында, көршілес Павлодар облысына және Алматы, Астана сияқты үлкен қалаларға шығарылу жоспарлануда. Бір сөзбен айтқанда, алдағы жылдары Қазақстан нарығына шығу жағын мықтап қолға алмақ. Компанияның басты артықшылығы – сапасының жақсы болуында, ал, бағасы халыққа тиімді болмақ. Экологиялық жағынан алғанда таза өнім жаңа технология әдісімен өндірілмек.
{jcomments on}Польшалық компанияның өндірістік қуатымен жіті танысқан Айбек Мүталапханұлы жаңа өндіріске әрқашан көмек қолын созуға әзір екендігін айтты. Сонымен қатар, шаһарымыздың тарихы, әлеуметтік-экономикалық дамуы жайлы сөз қозғай келіп, бүгінгі таңда қаланың экономикалық тұрғыда дамып келе жатқандығын, Елбасымыз Н.Назарбаевтың тапсырмасына сәйкес, шет елдерден серіктестік құруға инвесторлар тартылып, бірқатар жобалар сәтті жүзеге асып жатқандығы жайында компания басшылығын хабардар етті.
— Семей – шағын және орта бизнестің ошағы. Қаланың географиялық орналасуы шағын және орта бизнес саласына өте қолайлы. Шаһар халқының саны жыл санап өсіп келеді. Бізде инвесторлар тарту ісі де дұрыс жолға қойылған. Жуырда ғана 5 млрд. 600 млн. теңге көлеміндегі серіктестік меморандумдарға қол қойылды. 5 миллион теңге инвестиция құятын Еуропалық қайта құру және даму банкінің өкілдерін күтіп отырмыз. Жуырда Ислам даму банкінің өкілдерімен кездестік. Біздің экономикамыздың тірегі – шағын және орта бизнес, — деген Айбек Кәрімов Семей қаласы компания үшін оңтайлы жұмыс жасауға қолайлы қала екендігін атап өтті.
«Сан Профи» компаниясының президенті Марек Серафиньски семейліктердің қонақжайлылығы, ыстық ықыластары үшін алғысын айтып, Қазақстанда тұрмыстық химия өндірісі өркен жайып, осы салада бәсекелестіктің бәсі жоғарылап келе жатқандығын, бұл жерде аталмыш кәсіп түрін дамытуға мүмкіндіктің мол екендігін айтты. Ал, Польшада компания өнімдері өз елінде нарықтың 60 пайызын қамтамасыз етіп отыр. «Сан Профи» осындай жетістіктерін қазақстандықтармен бөлісуге әзір. Зауыт құрылысы мен іске қосылуы үшін 1 миллион доллар қаржы бөлінген екен. Кездесу барысында Семей қаласының әкімі Айбек Мүталапханұлы мен «Сан Профи» компаниясының өкілдері екі жақты келісімшартқа қол қойды.
Міне, бұйырса, біздің қалада тағы бір іргелі өндіріс ошағы салынады. Әлбетте, біріншіден, Семейдің әлеуметтік – экономикалық тұрғыдан дамуына өзіндік үлес қосса, екіншіден, жаңадан жұмыс орындары ашылары анық.
Әйгерім СӘРСЕНҒАЛИ,
«Семей таңы»
