Құрылыс – еліміздің инфақұрылымының дамуына әсер ететін бірден-бір сала. Құрылыс дегенде көз алдымызға әдемі үйлер, ерекше дизайнымен көзге түсетін ғимараттар елестейді.
Бүгінде Қатонқарағай ауданында құрылыс жұмыстары қарқынды жүруде. Көп қабатты үйлерден бастап жүзу бассейніне дейінгі нысандардың құрылысын аудан әкімі Дилдар Қалиқан өзі бақылауға алған, жөндеу жұмыстарын да назарында ұстап отыр.
Жуырда аудан әкімі құрылыс барысында бірқатар мәселе туындап отырған жүзу бассейніне барды.
— Қазірде мердігер компания құрылысты жалғастырып жатыр. Қыс түскенше толық аяқтаймын деп отыр. Нысан назарымда болады, — дейді Катонқарағай ауданының басшысы Дилдар Қалиқан.
Бассейн түрлі деңгейдегі спорттық жарыстар өткізуге, сол сияқты азаматтарды саламатты өмір салтына бейімдеуге, балаларды жүзуге үйретуге арналған. Мүмкіндігі шектеулі жандарға да барлық жағдай жасалмақ. Болашақта бұл бассейнде шыныққан катонқарағайлық жасөспірімдердің арасынан су спортының саңлақтары шығады деген сенімдеміз.
Ауданда облыс әкімі Даниал Кенжетайұлының тапсырмасымен ауылдық туризмді дамытуға бағытталған жобалар қолға алынған. Өткен жылы “Қаратай” қонақ үйі ашылса, биыл тағы да бірнеше осындай нысандар салынуда. Тамаша табиғатымен таңғалдыратын Катонқарағай жеріне келетін туристер өте көп, сондықтан туристік қонақ үй бизнесін де дамыту маңызды.
«Катонқарағай ауылының кіре берісінде әдемі орналасқан заманауи «A-Frame» деп аталатын үйлердің құрылысын көрдім. Жеке кәсіпкер, Катонқарағайдың тумасы Тілеубек Мұсабаев туған жерінен кәсіп ашуды жөн көріпті. Отбасымен Алматы қаласында тұрса да, туған жерінде кәсіп ашып жатыр. Туған топырағыма еңбегім сіңсін деген Тілеубек ағамыздай азаматтар көп болса, ауданымыздың туризм саласы тұрақты дами береді», — деп ризашылығын білдірді аудан әкімі инстаграм әлеуметтік желісіндегі жеке парақшасында.
Талшын ҚАЛИАСҚАР,
«Семей таңы»
