ҚАЗАҚ АНАЛАРЫ – ДӘСТҮРГЕ ЖОЛ
Қаламызда «Қазақ аналары – дәстүрге жол» республикалық қоғамдық бірлестігінің қолдауымен Қазақстанның әр өңірлерінде өтіп жатқан ақ кимешекті қазақ аналарының шеруі өтті. Ұлттық құндылықты ұлықтап, төл дәстүрді дәріптеу мақсатындағы республикалық жобаның негізін қалаушы – қазақ эстрадасына ұлттық бояу сіңіріп жүрген әртіс, продюсер, көп балалы ана Айнұр Жүгінісова.
— «Қазақ аналары – дәстүрге жол» атты қазақ аналарының шеруі ұрпақтарға арналған рухани құндылықты жандандыру мақсатында еліміздің әр өңірінде өтуде. Біз қаламызда да асыл аналарды, қыз-келіншектердің басын қосып, Абай атамыздың атындағы мешітінен бастап шеру жасайық деп шештік. Қала тұрғындарына ұлттық үлгідегі киім-кешекті көрсетіп өтейік деген бастамамызды қарапайым үйдегі анадан бастап, кәсіп бастап отырған әйелдер де, ақ жаулықты зейнеткер апаларымыз да қолдап келіп отыр. Бірлестікте халқымыздың салт-дәстүрімізге тоқталып, әңгіме өрбітіп, жас ұрпағымызға асылдың сынығын жеткізуге тырысамыз. Салт-дәстүрімізді білу – бұл өткенімізді ұмытпау, құндылықтарымызды сақтай отырып, болашаққа жол тарту, — дейді бірлестік мүшесі, ораторлық өнер курсы орталығының жетекшісі Райхан Ахметова.
Абай атындағы жаңа мешітте басталған шеру орталық алаңда жалғасын тапты. Шеруге жиналған аналар мен қыз-келіншектер нысандарға қоғамдық көлікпен жетіп, қала тұрғындарына ұлттық нақыштағы киім үлгілерін көрсетті. Ақ кимешекті аналар Абай ескерткішіне барып, Ұлы ақын рухына тағзым етіп қайтты.
Дана ТАЛҒАТБЕК,
«Семей таңы»
