Мемлекет басшысының тапсырмасы бойынша биылғы жылдың 1 қыркүйегінен бастап пилоттық режимде Отбасының цифрлық картасын енгізу басталды. Аталған пилоттық жоба туралы, Мемлекет басшысының қыркүйектегі Жолдауында айтылған тапсырмалары аясында әлеуметтік саладағы өзгерістер жайлы толығырақ Абай облысының аймақтық коммуникациялар қызметінде Еңбек және әлеуметтік қорғау комитетінің Абай облысы бойынша департамент басшысы Анар Ерембаева, Еңбек және әлеуметтік қорғау комитетінің Абай облысы бойынша департамент басшысының әлеуметтік мәселелер жөніндегі орынбасары Әсем Ахметова, Мемлекеттік әлеуметтік сақтандыру қорының Абай облысы бойынша филиалының директоры Ермек Қуанышев және БАҚ өкілдерінің қатысуымен өткен баспасөз конференциясында айтылды.
Дана ТАЛҒАТБЕК,
«Семей таңы»
Отбасының цифрлық картасы – әлеуметтік мәртебесіне байланысты, кепілдендірілген мемлекеттік қолдаудың қандай да бір түрін алу құқықтары туралы ақпарат беретін азаматтардың күн сайынғы «электрондық жаршысы», көрсетілетін мемлекеттік қызметтің проактивті форматының құралы. Яғни, мемлекет ақпараттық жүйе арқылы азаматқа тиісті органдарға жүгінбей-ақ мемлекеттік қолдаудың қандай да бір түрін алуды өзі ұсынатын болады.
— Бастапқы кезеңде Еңбек және әлеуметтік қорғау министрлігі мемлекеттік органдардың ақпараттық жүйелерінің деректері негізінде отбасылардың әл-ауқатының деңгейін және оларға жүктелген мемлекеттік қолдау шараларын анықтау бойынша жұмыс жүргізді. Қазірдің өзінде цифрлық картада шамамен 6 млн отбасы және 19 млн оның мүшелері туралы деректер қамтылған, сондай-ақ «отбасы портреті» деп аталатын деректер қалыптастырылған. Карта деректері отбасы және оның мүшелері мәртебесінің өзгеруіне қарай жаңартылып отырады. Мемлекеттік қолдау шараларын алу құқығы белгіленген жағдайда мемлекеттік қызмет көрсетуге келісім алу үшін әлеуетті алушыға СМС-хабарлама жіберіледі. Келісім алғаннан кейін әлеуметтік жәрдемақы, төлемдер немесе мемлекеттік қолдаудың басқа түрлері тағайындалып, кейін алушының банк шотына аударылады, — дейді Анар Айдарбекқызы.
Еңбек және әлеуметтік қорғау комитетінің Абай облысы бойынша департамент басшысы жоба кезең-кезеңмен жүзеге асырылатынын жеткізді. 2022 жылдың 1 қыркүйегінен бастап жәрдемақы мен әлеуметтік төлемдердің 9 түрі бойынша жаңа форматта қызмет алу мүмкіндігі ұсынылды. Келесі жылдың 1 қаңтарынан бастап тізбе әлеуметтік қорғау саласындағы қызметтермен кеңейтілетін болады. 2024 жылдың 1 қаңтарынан бастап денсаулық сақтау және білім беру салаларында мемлекеттік кепілдіктер енгізіліп, 2025 жылдан бастап мемлекеттік кепілдіктердің барлық түрлері қамтылатын болады.
Анар Ерембаева медициналық әлеуметтік сараптама қызметін трансформациялау жайлы да айтып өтті. Анар Ерембаеваның айтуынша, бүгінгі таңда Қазақстанда 705,5 мың мүгедек жан бар, оның 28 мыңнан астамы біздің облысымызда тұрады. Сондай-ақ Мемлекет басшысының тапсырмасына сәйкес мүгедектікті белгілеудің проактивті немесе «сырттай куәландыру» форматына көшу басталған. Оның мәні — азаматтың денсаулық жағдайына қатысты ақпарат пен осыған байланысты тіршілік қалыбының өзгеруі жөніндегі дәрігердің қорытындысы медициналық ақпарат жүйесіне енгізіледі.
Баспасөз мәслихатында сондай-ақ Еңбек және әлеуметтік қорғау комитетінің Абай облысы бойынша департамент басшысының әлеуметтік мәселелер жөніндегі орынбасары Әсем Ахметова зейнетақы жүйесінің тиімділігін арттыруда қолға алынған жаңа шаралар жайлы жан-жақты түсіндіріп берді.
Әсем Ахметова бала күтімі кезеңі 1 жастан 1,5 жасқа дейін ұзартылатынын, әйелдердің зейнетке 61 жаста шығатынын, елімізде жаңа жылдан бастап ең төменгі базалық зейнетақы мөлшері өсетінін айтты. Сондай-ақ жұмыс берушілердің қаражаты есебінен қосымша зейнетақы жарналарын аудару кезең-кезеңімен жүргізіледі – 2023 жылы 1,5 пайыздан басталып, 2027 жылға қарай 5 пайызға дейін жеткізіледі. Бұл шара зейнетақысының мөлшері зейнетақы аударымдарына тікелей байланысты болатын жас азаматтарды (1975 жылдан кейін туған) қолдауға мүмкіндік береді.
«МӘСҚ» АҚ Абай облысы бойынша филиалының директоры Ермек Қуанышев міндетті әлеуметтік сақтандыру жүйесіндегі аударымдардың жай-күйі туралы ақпарат берді.
Бүгінгі күні міндетті әлеуметтік сақтандырумен 6,6 миллион адам қамтылған. 8 ай ішінде Абай облысы мен ШҚО-да 21,2 млрд теңге төленген.
