Әлихан Бөкейхан университеті қабырғасында сайлау заңнамасын түсіндіру мақсатында «Адал сайлау үшін» сайлауалды штабының жиыны өтті. «Сайлауға қатысу – әркімнің азаматтық борышы» тақырыбындағы шараға қаладағы заңгерлер, ғалымдар мен университет студенттері қатысты.
Дана ТАЛҒАТБЕК,
«Семей таңы»
«Адал сайлау үшін» сайлауалды штабы Қазақстанның Заңгерлер одағының базасында құрылған. Заң ғылымдарының докторы, Әлихан Бөкейхан университеті проректоры Майгүл Матаева студенттерді алдағы сайлаудың өту барысымен таныстырып, Конституциялық реформа және сайлау заңнамасының ережелеріне тоқталды.
— Алдағы президенттік сайлау еліміз үшін жаңа кезең екенін айта кетуіміз керек. Бұдан былай Қазақстан Республикасының президенті бір мерзімге – 7 жылға ғана сайлана алады. Штаб отырыстары алдағы уақытта да жалғасын табады. Сайлауалды штабты құрудағы негізгі мақсат — сайлаудың әділ өтуіне атсалысып, «Сайлау туралы» Коституциялық заң және оған енгізілен өзгерістерді, алда өтетін сайлаудың ерекшеліктерін халыққа жеткізу. Кейбір жастар сайлауға алғаш рет қатысқалы отыр. Сондықтан оларға сайлау заңнамасын түсіндіріп, ақпараттандыру керек, — деді Майгүл Хафизқызы.
Майгүл Хафизқызы ҚР президенттігіне кандидаттар тіркелгенін, олар 21 қазаннан бастап өз бағдарламарына сәйкес үгіт-насихат жұмыстарын бастайтынын атап өтті. Сайлау кезінде әр сайлау учаскесінде заң бұзушылықтар мен алаяқтықтың алдын алу мақсатында бақылаушылар болады. Олардың қатарында кәсіби заңгерлер, адвокаттар және ғалымдар бар.
