ДӘСТҮРЛІ ДІН – ИМАНДЫЛЫҚ КЕПІЛІ

Семей қаласына жұмыс сапарымен Қазақстанның Православ шіркеуінің басшысы, Астана және Қазақстан митрополиті Александр келді. Қазақстан Митрополиттік округінің басшысы жексенбілік мектеп ғимаратында «Семипалатинск в годы лихолетья» атты көрмесінің ашылу салтанатына қатысып, шіркеуде литургия өткізді. Сапар барысында митрополит Александр Абай облысының әкімі Нұрлан Ұранхаевпен кездесті. — Қонақжай Абай жеріне қош келдіңіз! Православ қауымымен бірге біздің облыстың барлық тұрғындары сіздің сапарыңызды үлкен құрметпен қабылдағанына қуаныштымыз. Бізде, еліміздің барлық аймақтарындағыдай, түрлі этностар мен дін өкілдері тату өмір сүруде. Облыс тұрғындары Рождество мен Рамазанды, Қасиетті Пасха мен Құрбан айтты құрметпен атап өтеді. Бұл мерекелер бізді мейірімділікке, бірлікке үндейді. Мемлекет басшысының салмақты және дана саясатының арқасында Қазақстан түрлі діндердің «достық көпірі» деп танылды. Бұған әлемдік және дәстүрлі діндер съезінің өткізілуі дәлел бола алады, — деді Нұрлан Ұранхаев. Өз кезегінде Қазақстан митрополиті Александр Нұрлан Ұранхаевты және тұрғындарды облыстың құрылуымен құттықтап, жаңа өңірдің барлық салада жедел түрде дамитынына сенетінін жеткізді. Митрополит Александр сондай-ақ біздің аймақтағы православ шіркеуінің тарихына қатысты деректермен таныстырды.