Абай облысының әкімі Нұрлан Ұранхаев қаладағы бірнеше колледжді аралап, оқу кешенін көріп, материалдық-техникалық базасымен танысты.
Жадыра ТӨЛЕГЕНҚЫЗЫ,
«Семей таңы»
Нұрлан Тельманұлы алдымен геологиялық барлау колледжіне барды. Қазіргі күні сұранысқа ие мамандарды даярлайтын оқу орнында мыңға жуық студент білім алуда. Оларға 80-нен астам білікті педагог сабақ береді. Колледж директоры Ардақ Әділғазыұлының айтуынша, оқу орнында 2018 жылдан бастап «Жас маман» жобасы іске асырылып, 2021 жылы мемлекеттік сатып алу арқылы екі аудитория мен бір зертханаға 70 дана аппараттар мен жабдықтар сатылып алынған.
— Бұл жабдықтың бұрғылау тереңдігі 800 метрге дейін жетеді. Жер қойнауынан тау жыныстарының цилиндрлі үлігісін алады. Сол арқылы жер астында тау жыныстарының қандай түрі жатқанын біле аламыз. Ал мына техника жер асты суларын іздеуге, ұңғымаларды бұрғылауға бағытталған. Бұған да «Жас маман» жобасы аясында қол жеткіздік. Қазір колледжде бұрғылау кешені толықтай дайын,- деді колледж директоры Ардақ Әділғазыұлы.
Колледж басшысының айтуынша, өткен оқу жылында 185 түлектің 174-і жұмысқа орналасқан. Ал биыл 241 студент оқу орнын тамамдағалы отыр. Қазірдің өзінде колледжге түрлі компаниялардан 278 сұраныс келіп түскен. Оқу орнының түлектері бүгінгі күні KazMinerals, Полиметалл, Бақыршық, Қаражыра және басқа да көптеген беделді компанияларда еңбек етуде.
Аймақ басшысы оқу қабинеттерін, құзыреттілік орталығын көрді. Колледжің мұржайына кіріп, оқу орнының тарихымен кеңірек танысты.
Нұрлан Тельманұлы барған келесі оқу орны — Геодезия және картография жоғары колледжі. Бүгінгі күні колледжде 400-ге жуық студент «Геодезия және картография» мамандығы және «Техник-картограф», «Техник-геодезист» және «Техник-аэрофотогеодезист» біліктіліктері бойынша білім алуда.
— Оқытушылардың 90 пайызы — осы колледждің түлектері. Соңғы екі жыл ішінде оқытушыларды кәсіптік ұйымдардан тартып отырмыз. Биыл ұйымдардан төрт мұғалім келді,- дейді колледж директоры Қаныш Мақсұтұлы.
Аймақ басшысы колледждің оқу кабинеттерін, кітапхананы көріп, оқытушылармен, студенттремен сұхбаттасты.
Осыдан соң Нұрлан Тельманұлы Электротехника колледжінебарды. Онда 800-ге жуық студент білім алуда. Аймақ басшысы алдымен колледж базасында орналасқан құзыреттілік орталығын көрді. Мұнда студенттер жұмысшы мамандықтар арасында Астана қаласында өтетін республикалық Wordskills чемпионатына және Австрияның Зальбург қаласында өтетін дүниежүзілік чемпионатқа дайындалуда.
— Қазір біз Германия мемлекетімен ERASMUS+ бағдарламасы шеңберінде дуалды оқытуды ұйымдастыру бойынша жұмыс істеп жатырмыз. Былтыр осы мақсатта 50 млн теңге бөлініп, оқытушыларымыз Германия мен Австрияда білім алып келді. Жобаның екінші кезеңіне де өттік, — дейді колледж директоры Марат Серікболұлы.
Нұрлан Тельманұлы сонымен қатар колледж базасындағы цехпен, соңғы үлгідегі дәнекерлеу құрылғыларымен танысты. Айта кетерлігі, биыл аталған оқу орны Siemens компаниясымен келісімшартқа отырып, заманауи құрылғыларға қол жеткізген.
— Біз Қазақстандағы колледждердің арасында алғаш болып Siemens компаниясымен келісімшартқа отырдық. Нәтижесінде екі оқытушымыз Алматы қаласына барып, шеберлік сыныбына қатысып қайтты,- дейді колледж директоры Марат Серікболұлы.
Аймақ басшысы Семей қаласындағы Бизнес және сервис колледжіне аялдады. Мұнда студенттер «Тамақтандыру кәсіпорындарының өнім өндіру технологиясы және оны ұйымдастыру», «Есеп және аудит», «Тамақтандыруды ұйымдастыру», «Менеджмент», «Маркетинг», «Дизайн», «Қонақ үй шаруашылығы қызметін ұйымдастыру», «Туризм», «Шаштараз өнері және сәндік косметика» мамандықтары бойынша білім алуда. Колледж директоры Альмира Хожанова аймақ басшысын оқу орнында ашылған мейрамхана қызметі орталығымен таныстырды. Мұнда даяшы мамандығы бойынша оқитын студенттер мейрамхана қызметін меңгеруде. Осы орайда облыс әкімі аймақта жоғары деңгейде қызмет көрсететін даяшылар жетіспейтінін тілге тиек етті.
— Абай облысы жаңадан құрылғаннан кейін, бізге жан-жақтан келетін меймандар көп. Мейрамханаларда білікті даяшылардың жетіспейтінін байқап жүрмін. Кәсіби даяшыларға, аспаздарға сұраныс әрдайым жоғары,- деді облыс әкімі Нұрлан Ұранхаев.
Өткен жылы колледж қабырғасындағы «Жас маман» жобасы аясында «Қоғамдық тамақтандыру», «Тігін өндірісі және киім үлгілеу» және «Өнеркәсіптік өнімнің дизайны» сынды үш мамандық бойынша 6 зертхана мен 5 шеберхана 47 құрал-жабдықпен, 136 техникамен жабдықталған. Колледж оқытушылары бірнеше шет елде болып, тәжірибе алмасуда. Облыс әкімі қол жеткізген жаңа техникаларды көріп, кондитерлік зертхана жұмысымен танысып, оқу орны директорына әлемдік деңгейдегі чемпионаттарға қатысуды, сондай-ақ жатақхана салу мәселесін қарастыруды ұсынды.
