2025 жылдың 6 мамырында Шәкәрім университетінің Жоғары бизнес мектебі қаламыздағы 8 колледждің студенттері арасында «Жылдармен, ғасырлармен – есімізде!» атты байқау ұйымдастырды. Аталмыш байқау Ұлы Отан соғысындағы Жеңістің 80 жылдығына арналды.
Шара үш кезеңнен тұрды. Бірінші тур – «Біз Жеңіс күнін отбасымызбен қалай атап өтеміз?» тақырыбындағы бейнепрезентациялар болды. Бұл кезеңде қатысушылар отбасындағы патриоттық дәстүрлер мен соғыс ардагерлеріне көрсетілетін құрмет жайында әсерлі бейнематериалдар ұсынды. Екінші тур – Ұлы Отан соғысы тарихына байланысты тест тапсырмалары арқылы студенттердің білім деңгейі анықталды. Үшінші тур – соғыс тақырыбына арналған поэзия байқауы болды. Қатысушылар жүрек тебірентер өлең жолдары арқылы Отан үшін от кешкен батырларға деген алғыс сезімдерін білдірді.
Байқау қорытындысы бойынша жеңімпаздар мен жүлдегерлер төмендегідей анықталды:
І орын – «Батальон» командасы – Д. Қалматаев атындағы жоғары медициналық колледжі. Команда мүшелері жоғары дайындық пен терең патриоттық сезімді көрсете білді.
ІІ орын – екі команда бөлісті:
– «Рухани миллионерлер» – Шәкәрім жоғары колледжі,
– «Авангард» – Рымбек Байсеитов атындағы Семей қаржы-экономикалық колледжі.
ІІІ орын келесі үш командаға бұйырды:
– «Ұлылардың ұрпағына» – Семей көпсалалы жоғары колледжі,
– «Жеңіс ұрпақтары» – Электротехникалық колледж,
– «Алаш» – Гуманитарлық-заң және техникалық жоғары колледжі.
Байқауға белсенді қатысқаны үшін алғыс хаттармен марапатталғандар:
– «Солдаттар естелігі» – Дулат Бабатайұлы атындағы Семей жоғары колледжі,
– «Рубеж» – Ақпараттық технологиялар және жаңа технологиялар жоғары колледжі.
Сонымен қатар, қатысушыларды дайындаған жетекшілерге де университет атынан алғыс хаттар табыс етілді.
Ұйымдастырушылар Семей қаласындағы колледждердің студенттеріне, жетекшілеріне және директорларына белсенді қатысқандары үшін алғыстарын білдіріп, алдағы уақытта да осындай тағылымды шараларда кездесуге ниетті екенін жеткізді.
Хасенова К.Е. – э.ғ.к., Жоғары бизнес мектебінің аға оқытушысы
Тлемисов У.Б. – Жоғары бизнес мектебінің аға оқытушысы
