Бүгін 21 қараша күні Абай облысының өңірлік коммуникациялар қызметінде жеке тұрғын үй құрылысы үшін жер учаскелерін беру және Семей қаласының Бас жоспарын іске асыру туралы баспасөз конференциясы өтті. Абай облысы ауыл шаруашылығы және жер қатынастары басқармасының басшысы Анзор Абаев, Абай облысы бойынша сыбайлас жемқорлыққа қарсы қызметтің алдын алу басқармасы басшысының орынбасары Жәнібек Қуанов конференция спикерлері болды.
Анзор Абаев жеке тұрғын үй құрылысы үшін жер телімдерін беру ҚР Жер кодексінің 50 бабының 2 тармағы негізінде жүзеге асатынын, соның негізінде ҚР азаматтарына 10 сотық жер тегін берілетінін еске салды.
— Тұрғындардың өтініші тіркеуге алынған соң жер телімдерін беру туралы ережеге сәйкес аумақ қарастырылады. Жер телімін алғаннан кейін, тұрғын үй құрылысы басталуы керек. Осыдан кейін ғана жер телімі азаматтың атына ресімделеді- деді Анзор Абаев.
Басқарма басшысының айтуынша, бүгінгі күні Семей қаласында 28 мың 991 адам жер телімін алу үшін кезекте тұр. Бекітілген бас жоспарға сәйкес, жеке тұрғын үй құрылысы үшін 4,5 мың гектар аумақты қамтитын 12 тұрғын үй массивінен 17 543 жер телімі қарастырылған. Бүгінгі күні үш тұрғын үй массивіне инжерлік-коммуникациялық желілер тартылуда. Оларда 3 495 жер телімі бар.
— Семей қаласының жер қатынастары бөлімінің мәліметінше, 2022 жылы қалада кезекте тұрғандарға Ұшақтар және Комсомол аудандарынан жеке тұрғын үй құрылысы үшін 478 жер телімі беріледі. Оның ішінде 75 жер телімі берілген. Қалған аумақтар рәсімделу үстінде. Жеке тұрғын үй құрылысына жер телімдерін беру үшін алдымен инженерлік-коммуникациялық желілер тартылуы керек. Бұл орайда Семей қаласы территориясындағы аудандар шартты түрде үш кезеңге бөлінген. Бірінші кезеңде Ұшақтар және Комсомол аудандары инженерлік-коммуникациялық желілермен қамтылды. Екіншісі кезеңде Ақсай ауданына тиісті инфрақұрылым желілері тартылады. Үшінші кезеңде қаладағы тағы 9 тұрғын үй массиві үшін жобалық-сметалық құжаттар әзірленеді,- деді Анзор Абаев.
