ҚР Президенті Қасым-Жомарт Тоқаевтың тапсырмасымен, орталық және жергілікті атқарушы органдардың қысқы жылыту маусымына дайындығын тексеру жөніндегі комиссия құрылды. Комиссия төрағасы ретінде Президент Әкімшілігі басшысының бірінші орынбасары Тимур Сүлейменов тағайындалды. Комиссия құрамына Бас прокуратураның, жоғары аудиторлық палатаның, сыбайлас жемқорлыққа қарсы іс-қимыл агенттігінің және басқа да уәкілетті мемлекеттік органдардың өкілдері кіреді.
Президент Қасым-Жомарт Тоқаев тексеру жұмыстарын он күн ішінде аяқтап, қорытындылар мен ұсыныстар әзірлеуді тапсырды. Осыған орай арнайы комиссия Абай облысындағы жағдаймен танысу мақсатында Семей қаласындағы жылу электр орталықтарын аралады. Министрдің айтуынша, шаһарға қосымша жылу электр орталықтарын салу қажет.
— Семейдегі жағдай керемет деп айта алмаймын. Жылумен және сумен қамтамасыз ету жеткілікті емес. Жаңа жылу көздері қажет. Бұл мәселені депутаттармен, әкімдермен ақылдасып, талқыладық. Қосымша жылу электр станцияларын немесе орталықтарын салу жоспарға енді. Алайда бұл алдағы 1-2 жылда шешіле салатын мәселе емес. Бүгінгі күннің проблемасы — көмірдің жетіспеуі. Көмір бар, бірақ жеткілікті көлемде емес,- деді Тимур Сүлейменов.
Энергия өндіруші ұйымдардың жылу желілері мен технологиялық жабдықтарының тозуы жылу энергиясын өндіру мен тасымалдауда үлкен ысырапқа әкелуде. Осыған орай, бүгінгі таңда Семей қаласы мен Абай ауданы Қарауыл ауылына жылу желілерін тартуға 1,3 млрд теңгеге 3 жобалық-сметалық құжат әзірленді. Сондай-ақ желілердің тозуын азайту мақсатында табиғи монополиялар субъектілері инвестициялық бағдарламалар аясында шаралар қабылдауда.
Абай облысы қуаттылығы 100 Гкал/сағ асатын 4 ірі жылу көзімен (ЖЭО-1, ҚР 1, Жезкент кентіндегі қазандық және орталық қазандық) және өнімділігі 100 Гкал/сағ төмен (Семей қаласында 19 бірлік және облыстың 6 ауданында 21 бірлік) 40 жылу көзімен қамтамасыз етілген. Сонымен қатар облыста 273 автономды қазандық жұмыс істейді.
Жылумен қамтамасыз ету саласындағы негізгі проблемалардың қатарында жылу желілерінің тозуы да бар. Желілердің тозуы орташа пайызбен есептегенде 63,8 пайызды құрайды.
Абай облысын 2027 жылға дейін дамытудың кешенді жобасына енгізілген бірінші кезектегі шаралар жоспарында 149,1 млрд теңгені құрайтын 29 жоба бар. Сондай-ақ Аягөз қаласында жылу электр орталығы мен Курчатов қаласында орталық қазандық салу қажет.
Кездесу барысында, Мемлекет басшысының тапсырмасы аясында Энергетика министрлігі Семей қаласындағы ЖЭО-3 құрылысының техникалық-экономикалық негіздемесін әзірлеу туралы шешім қабылданды.
Семей қаласының жылу көздерін аралаудан кейін Қазақстан Республикасы Президенті Әкімшілігі Басшысының бірінші орынбасары Тимур Сүлейменовтің төрағалығымен Абай облысының әкімі Нұрлан Ұранхаевтың, орталық органдар басшыларының, қалалар мен аудандар әкімдерінің, басқармалар мен коммуналдық кәсіпорындардың, сондай-ақ, энергетикалық компаниялар басшыларының қатысуымен жиын өтті. Күн тәртібінде Абай ауданында жылу беру маусымына дайындық барысы қаралды.
— Мемлекет басшысы Қасым-Жомарт Кемелұлы Тоқаевтың тапсырмасы бойынша менің жетекшілігіммен республикада орталық және жергілікті атқарушы органдардың қысқы жылыту маусымына дайындық жөніндегі қызметін тексеру үшін арнайы комиссия құрылды. Комиссия құрамына Бас прокуратураның, Жоғарғы есеп палатасының, Сыбайлас жемқорлыққа қарсы іс-қимыл агенттігінің және басқа да уәкілетті мемлекеттік органдардың өкілдері кірді. Президент тапсырмасы бойынша комиссия өз жұмысын он күн ішінде нақты қорытындылар мен ұсыныстарымен аяқтауы қажет, — деді Тимур Сүлейменов.
— Жылумен қамту саласындағы негізгі проблемалардың қатарында жылу желілерінің де жоғары тозуы бар. Желілердің орташа тозуы 63,8%-ды құрайды. Соның ішінде Семей қаласы бойынша 68 пайыз жылу желілері тозған. Энергия өндіруші ұйымдардың жылу желілері мен технологиялық жабдықтарының жоғары тозуы жылу энергиясын өндіру мен тасымалдауда үлкен шығынға әкеледі. Осыған орай, бүгінгі таңда Семей қаласы мен Абай ауданы Қарауыл ауылында жылу желілерін тартуға 1,3 млрд теңгеге 3 жобалық-сметалық құжаттама әзірленді, — деді кездесуде облыс әкімі.
Кеңес қорытындысы бойынша Президент Әкімшілігі Басшысының орынбасары Тимур Сүлейменов облыстың барлық жылу көздерін тиісті сападағы көмірді жеткізуді, «ҚТЖ» ҰК» АҚ «Қаражыра» АҚ сұранысына сәйкес облыстың елді мекендеріне көмір жеткізу үшін қажетті вагон санын көбейтуді, «Бірыңғай энергетикалық сервистік компания» АҚ-қа жылу беру маусымында Абай облысының тұтынушыларын электрмен үздіксіз қамтамасыз етуді тапсырды.
Абай облысының әкімдігі
