АРДАГЕР ФУТБОЛШЫЛАР МАРАПАТТАЛДЫ
Жақында Қазақстан футбол федерациясы өзінің 30 жылдық мерейтойын атап өткен болатын. Осы атаулы күнге орай, Қазақстан футбол федерациясының өңірлік филиалының басшылары арнайы жасалған «Қазақстан футбол федерациясына 30 жыл» белгісін футболдың дамуына еңбек сіңірген әріптестеріне табыстады.
Қаламызда көптеген отандық футболшылар мен жаттықтырушылар, инспекторлар мен төрешілер, менеджерлер және басқа да мамандар тәрбиеленіп шығып, бұл салада көптеген жеңістерді сыйлап, рекордтарды жаңартты.
Салтанатты жиынға Абай облысының әкімі Нұрлан Ұранхаев қатысып, футболшыларға марапаттар тапсырды.
Олардың қатарында Виталий Шевелёв, Анатолий Сидельников, Владимир Томачинский, Александр Борисов, Владимир Боярских, Болат Райсханов, Владислав Плескачёв, Виктор Заякин, Василий Винничук, Вячеслав Кондратенко, Қайрат Аубакиров, Сергей Ерёмин сынды үздіктер мен футбол жанкүйерлері бар.
Жергілікті «Цементник» пен «Спартак», сондай-ақ елімізге ерекше танымал семейлік «Елім-ай» кәсіби футбол клубында үлкен жетістікке қол жеткізген ойыншылар мен мамандар да бұл белгінің иегері атанды. 1990-жылдардың ортасында бұл команда сол кездегі клубтың президенті, ал қазір Абай облысының әкімі Нұрлан Ұранхаевтың басшылығымен елімізде бірінші болып Қазақстан Республикасының үш дүркін чемпионы атанып, бір маусымда Қазақстан чемпионатын, Кубогын және Суперкубогын жеңіп алған болатын. Халықаралық аренада да отандық футбол тарихында алғашқы ұлттық рекордтардың жиынтығын орнатқан команда.
Семей Қазақстан футболының отаны екені белгілі. Еліміздегі ең алғашқы ресми футбол клубы 110 жыл бұрын Семей қаласынада құрылған, содан бері футбол семейліктердің сүйікті спорт түріне айналды.
Фариза ТӘТТІМБЕТҚЫЗЫ,
«Семей таңы»
