Қазақстанда төрт күннен бері шетелдік көліктерді заңдастыру жүріп жатыр. Мұндай мүмкіндік жүргізушілер үшін бір рет қана беріледі, ал тіркеу үшін төленетін алым барлығына бірдей, деп хабарлайды Stan.kz ақпарат агенттігі Еуразия бірінші арнасына сілтеме жасап.
23 қаңтардан бастап мамандандырылған Халыққа қызмет көрсету орталықтарының жұмыс уақыты 2 сағатқа ұзарды. Көлігін тіркегісі келетіндер кезекке онлайн тұрады. Бұл ХҚКО-да ұзын-сонар кезек туындауының алдын алады. Жүк және жеңіл көліктер үшін тіркеу алымы 200 мың теңге.
Көлікті тіркемес бұрын ангарда вин-коды тексеріледі. Тек осыдан кейін ғана иесіне қатысты ақпарат енгізіліп, көлікке іздеу жарияланбағаны анықталады.
Шетелдік автокөлікті елімізде еш қиындықсық заңдастыру үшін өзге елде есептен шығару керек. Сонымен қатар көлік Қазақстанға 2022 жылдың 1 қыркүйегіне дейін кіргізілуі де маңызды.
Родион жаңа нөмірін көшеде-ақ ауыстырған. Енді оның көлігі «қазақ болды» дейді.
«Бұл енді менің көлігім, менікі екеніне сенімдімін. Әрине, 1,5-2 миллион теңге үнемдедім. Сату да оңай болады. Барлығы керемет», – деді көлік жүргізушісі Родион Яковенко.
Шетелдік көліктерді жеңілдетілген бағамен тіркеу тек бір рет жүргізіледі. Осылайша жүргізушілер ескі көліктерін жаңасына ауыстыра алады. ХҚКО-ға бірнеше күнде 800-ден аса өтініш түскен.
Көліктерді заңдастыру 1 шілдеге дейін жалғасады. Мерзім аяқталған соң тіркеуден өтпеген автокөліктердің «тағдыры қалай шешілетіні» белгісіз.
