Мемлекет басшысының тапсырмасына сәйкес, бүгінде әкімдердің халықпен кездесулері тоқсан сайын өткізілуде. Бұл ретте қала әкімі Нұрбол Нұрсағатов Семейге қарасты елді мекен тұрғындарымен кездесіп, атқарылған жұмыстар туралы есеп беруде.
Дана ТАЛҒАТБЕК,
«Семей таңы»
Шаһар басшысы ең алдымен Алғабас ауылдық округінің тұрғындарымен жүздесті. Облыс орталығынан 346 шақырым жерде орналасқан ауыл тұрғындарымен кездесу өткен жылы жылы күрделі жөндеу жүргізілген клуб үйінде өтті.
Қала әкімі өткен жылы ауыл көлемінде жүзеге асырылған істер жайында тұрғындар алдында есеп беріп, алдағы жоспарларға, мақсат-міндеттерге тоқталды.
Алғабас ауылына 2023 жылы қалалық бюджеттен 90 млн теңге бөлінді. Оның ішінде нақты жобаларды жүзеге асыруға 52 млн теңге қарастырылған.
Кездесу барысында қала әкімі ағымдағы жылы атқарылуы тиіс жұмыстардан хабардар етті.
— Алғабас ауылының шетіндегі балалар саябағына заман талабына сай қоршау орнату үшін 19 млн теңге қаражат бөлінді. Сонымен қатар бұқаралық спортты дамыту мақсатында ауыл маңында 9 млн теңгеге спорт алаңын салу және әкімдік ғимаратының алдынан 10 млн теңгеге хоккей кортын жасау жоспарланып отыр. Ауылдық әкімдік ғимаратына санитариялық торапты су құбыры кәрізі өткізіледі, бұл жұмыстарға 8 млн теңгеге жұмсалмақ. 4 млн теңге қаржы ауыл сыртына қар ұстауға арналған қоршау тұрғызуға бөлінеді. Сонымен қатар ауылдағы санитарлық тазалықты сақтау үшін бюджеттен қаржы бөлінді, — деді қала әкімі Нұрбол Төлегенұлы.
Алғабас ауылы халқын экологиялық жағдай алаңдатып отыр. Кездесуге қатысқан тұрғындар Берікқара кен орнында «Арс Минералс» компаниясы алтын өндіру кезінде қолданатын сілтілі-қышқылдық әдісі қоршаған ортаға және тұрғындардың денсаулығына зиян келтіретіндігін айтып шағымданды. Жергілікті тұрғындар өндіріс барысында экологиялық нормалар қаншалықты сақталатынын анықтау қажет деп санайды, сондықтан кен орнындағы шығарындыларды өлшеуді сұрады. Қала әкімі өз кезегінде Абай облысының экология департаментінің мамандары кен орнында болып, өлшемдер жүргізетіндігін мәлімдеді.
Нұрбол Нұрсағатовтың тұрғындарымен кездесуі Қараөлең ауылдық округінде жалғасты. Биыл Қараөлең ауылдық округінде де бірқатар жобаларды жүзеге асыру жоспарланып отыр. Жалпы, ауылдық округте әлеуметтік-экономикалық және қоғамдық-саяси жағдай тұрақты.
— 2023 жылы 9 млн 574 мың теңгеге Қайнар ауылындағы өрт сөндіру бекеті ағымдағы жөндеуден өткізілетін болады. Сонымен қатар округ әкімдігі ғимаратының сол қанатына ағымдағы жөндеу жүргізу үшін 15 млн 968 мың теңге бөлінді. 23 млн 971 мың теңге қаражат бөлініп, мәдениет үйі алдындағы аллея жаңартылады, заман талабына сай архитектуралық шағын нысандар, орындықтар, жарықтандыру қойылатын болады.
Сондай-ақ Қайнар ауылындағы бірнеше көше жарықтандырылмақ. Абыралы ауруханасының шатыры мен қазандығы облыстық денсаулық басқармасы қаражаты есебінен күрделі жөндеуден өткізілмек.
Ауылдағы дене шынықтыру-сауықтыру кешенінің құрылысы аяқталды. Қазіргі таңда қалалық әкімдіктің құрылыс бөлімі соңғы тексеру жұмыстарын жүргізіп, спорт басқармасының қарамағына өткізу үшін жұмыстар жүргізуде,- деді қала әкімі Нұрбол Нұрсағатов.
Есеп беру жиынына келген тұрғындар тарапынан халықтың денсаулығын сақтау, сондай-ақ кәсіп ашу, тағы басқа да мәселелер бойынша қойылған сұрақтарға шаһар басшысы мен тиісті сала басшылары жауап берді.
Қала әкімі тұрғындарды алда тұрған жоспарлы жұмыстарды сәтті жүзеге асыру үшін бірлесе жұмыс істеуге шақырды.
