Рәміздер күні – егемен еліміздің тарихында өзіндік орны бар ерекше мереке. Еліміздің егемендігінің темірқазығы саналатын Мемлекеттік рәміздер күні Ақсуат ауданында да аталып өтті.
Хамза СӘТИЕВ,
«Semeı tańy»
Елдік пен еркіндіктің нышандарына деген замандастарымыздың сүйіспеншілгі – Отанға деген құрметтің белгісі. Аудан орталығы Ақсуаттағы орталық алаңда, ҚР Мемлекеттік рәміздері күніне орай, аудандық ішкі саясат, мәдениет бөлімі қызметкерлерінің ұйымдастыруымен мерекелік шара өткізілді. Әнұраннан бастау алған шарада патриоттық әндер шырқалып, мемлекеттік туды желбіретіп жүріп өткен автокөліктер шеруінің әсері ерекше болды. Халықтың өз еліне деген ниет-пейілін айғақтайтын рәміздеріміздің айбыны тағы бір мәрте асқақтады. Мемлекеттік Туымыз бен Елтаңбамыз, оған қосыла шырқалатын Әнұранымыз ұрпақтан-ұрпаққа жалғасып, жастарды патриоттық сипатта тәрбиелеудің тірегі болмақ.
Мереке күні Ақсуат ауылының жұртшылығы орталық алаңға жиналды. Рәміздерді ұлықтауға арналған іс–шарада көгілдір түсті туымыз бен елтаңбамыз салтанатты түрде сахнаға шығарылды. Отанға деген сүйіспеншілік ән боп шырқалды. Аудан халқы мәдениет бөлімі ұйымдастырған өнер жұлдыздарының концертін тамашалап, рәміздер күніне арнап кітапхана қызметкерлері ұсынған кітап көрмесімен танысты.
