Семейде Semey Hub ұйымдастырған «GovTech саласындағы жасанды интеллектіні дамытудың перспективалары» тақырыбында дәрістік-практикалық workshop өтті. Оған мемлекеттік қызметшілер, мәслихат депутаттары, ведомстволық бағынысты ұйымдар мен квазимемлекеттік сектор басшылары, сондай-ақ цифрландыру саласының мамандары қатысты.
Қатысушыларға жасанды интеллектінің мемлекеттік басқару мен мемлекеттік қызметтер көрсету жүйесін қалай өзгертіп жатқаны түсіндірілді. Негізгі назар ЖИ-ді практикалық қолдануға — міндет қоюдан және деректермен жұмыс істеуден бастап, нәтижеге дейінгі үдеріске аударылды.
Абай облысының цифрлық технологиялар басқармасының басшысы Абзал Серікұлы жасанды интеллектіні енгізу мәселелерді жедел шешудің қуатты құралы екенін атап өтті. Спикердің айтуынша, бұл технология мемлекеттік басқару жүйесін сапалы жаңа деңгейге көтеруге мүмкіндік береді.
– Қазіргі таңда цифрландыру Абай облысының дамуының негізгі бағыттарының бірі болып отыр. Біз жаңа технологияларды жай ғана енгізуді емес, халықтың күнделікті өмірін жеңілдететін, мемлекеттік қызметтердің сапасы мен қолжетімділігін арттыратын нақты шешімдер табуды көздейміз. Мемлекеттік аппарат пен IT-қоғамдастықтың ынтымақтастығы – біздің жетістігіміздің негізгі кілті. Өйткені шынайы инновациялар мемлекеттің қажеттіліктері IT-саланың икемділігімен ұштасқан жерде пайда болады. Біз сіздердің идеяларыңыз бен батыл көзқарастарыңызға әрдайым ашықпыз. Жасанды интеллект – басқару жүйесін жаңа деңгейге көтеруге қабілетті қуатты құрал. Оны қағазбастылықты азайтуға, талдау жұмыстарын жетілдіруге және азаматтармен кері байланысты жақсартуға қалай пайдалануға болады? Бүгінгі workshop осы сұрақтарға жауап табатын алаң болады деп сенемін, – деп атап өтті Абзал Серікұлы.
Workshop барысында GovTech ұғымы және ЖИ-агентінің чат-бот пен қарапайым ақпараттық жүйеден айырмашылығы түсіндірілді. Сонымен қатар қатысушылар Қазақстанда жасанды интеллектіні қолданудың құқықтық негіздерімен, соның ішінде «Жасанды интеллект туралы» ҚР Заңы және Цифрлық кодекспен танысты.
Semey Hub директоры Анет Тұрсынжанның айтуынша, воркшоп барысында мемлекеттік қызметшілер жасанды интеллектіні қолдану мүмкіндіктері туралы көбірек ақпарат алып, оның артықшылықтарымен танысты.
– Бүгін Абай облысының цифрлық технологиялар басқармасымен бірлесіп, «Мемлекеттік қызметтегі жасанды интеллект» тақырыбында workshop өткіздік. Спикеріміз Владислав Набока кеңсе жағдайында ЖИ-агентін қалай құруға болатыны жөнінде шеберлік сабағын өткізді. Сондай-ақ жасанды интеллектіні қандай мекемелерде енгізуге болатынын талқылап, киберқауіпсіздік пен кибергигиена мәселелерін қозғадық. Бұдан бөлек, KAZ LLM моделін қолдану мүмкіндіктері туралы айтылды, – деді Анет Тұрсынжан.
Қолданыстағы мемлекеттік ЖИ сервистері, соның ішінде eGov GPT, eGov AI, Smart Data Ukimet және «Цифрлық отбасы картасы» мысалында қатысушыларға «міндет – деректер – модель – нәтиже» қағидаты бойынша жасанды интеллект шешімдерінің қалай құрылатыны көрсетілді.
Кездесу барысында 2030 жылға дейін GovTech саласында жасанды интеллектіні дамытудың негізгі бағыттары да талқыланды. Олардың қатарында проактивті мемлекеттік қызметтер, ішкі процестерге арналған ЖИ-агенттері, тәуекелге бағдарланған бақылау және болжамды талдау, нормашығармашылық пен құқықтық талдауда ЖИ-ді қолдану, сондай-ақ деректердің бірыңғай архитектурасы мен ведомствоаралық ақпарат алмасу бар.
