«Еуропалық нәтиже»: Құрылтай сайлауына азаматтардың келуі туралы шетелдік сарапшылар

Халықаралық байқаушылар мен сарапшылар Қазақстанда өткен Құрылтай депутаттарының сайлауына, сайлаушылардың белсенділігіне және жаңа парламенттік модельдің перспективаларына оң баға берді.
Польшаның KontrolerINFO басылымының бас редакторы Анджей Казимерский сайлаушылардың белсенділігін демократиялық үдерістердің даму көрсеткіші деп атады. Оның айтуынша, азаматтардың дауыс беруге қатысу туралы шешімді өз бетінше қабылдауы маңызды.
«75% азаматтардың дауыс беруі – еуропалық нәтиже. Бұл демократияның дамып келе жатқанын көрсетеді. Қазір адамдар дауыс беруге міндет болғандықтан емес, өздері қалағандықтан келді», – деді Казимерский.
Ол сондай-ақ сайлаушылармен сөйлесіп, олардың сайлау учаскелеріне не үшін келгенін және сайлау қорытындысынан не күтетінін сұрағанын айтты. Оның сөзінше, қазақстандықтар өз үміттерін өмір сүру сапасын жақсартумен және елдің одан әрі дамуымен байланыстырады.
Арменияның Тұрақты даму және мемлекеттік басқару институтының жетекшісі Геворг Меликян сайлауды елдегі институционалдық жаңғыру үдерісі аясында қарастырды. Оның пікірінше, қазіргі саяси үдеріс Қазақстанның мемлекеттік басқарудың неғұрлым тиімді моделін қалыптастыруға ұмтылысын көрсетеді.
«Техникалық тұрғыдан алғанда, біз сайлаушылардың өте жоғары белсенділігін көрдік. Мұндай көрсеткіш демократиялық елдерде жиі кездесе бермейді. Мұнда азаматтардың қатысу деңгейі айтарлықтай жоғары, өйткені адамдардың үміті мен сенімі бар. Осы үміттердің барлығы жаңа жүйе мен жаңа бастамалар арқылы жүзеге асуын тілейміз», – деді Меликян.
Ол сондай-ақ сайлау учаскелеріндегі ахуалға назар аударды. Оның айтуынша, бақылау барысында дауыс беру үдерісі ашық әрі айқын өтті. Ал азаматтардың өздері сайлауға қатысуды тек саяси таңдау жасау мүмкіндігі ретінде ғана емес, маңызды қоғамдық оқиға ретінде қабылдаған.