Абай облысында орман өрті кезінде жүрек жеткіліксіздігінен қаза тапқан орман шаруашылығы тракторшысының отбасына төленетін төлемдерді комиссия айқындайды. Бұл туралы Stan.kz ақпарат агенттігі хабарлайды.
Мұны ТЖМ басшысының орынбасары Ибрагим Күлшімбаев Сенат аясында мәлімдеді.
«Бір уақытта 14 орманшы қаза тапты, содан кейінбөлек шыққан тракторшыға іздеу салынды. Оның мәйіті он бесінші болып табылды. Жергілікті атқарушы органның комиссиясы мен жұмыс беруші төлемдер мен олардың мөлшерін анықтайды. ТЖМ бұл мәселені шешпейді», – деді вице-министр.
Күлшімбаев өртті 60-шы жылғы ескі машиналар сөндіріп жатқаны туралы ақпаратты жоққа шығарды.Оның айтуынша, бұл жалған.
Еңбек және әлеуметтік қолдау министрі, вице премьер-министрі Тамара Дүйсенова қаза тапқан 15 қызметкер де өрттің құрбаны деп ресми түрде танылғанын айтты. Бұл ретте қаза тапқандардың отбасыларына төленетін тиісті төлемдердің көлемін үкіметтік комиссия алдағы 10 күн ішінде айқындайды.
Естеріңізге сала кетейік, кеше Парламент қабырғасында Бас прокурордың орынбасары Жандос Өміралиев Архиповты өрт құрбандарының тізіміне енгізбеуі мүмкін деп мәлімдеген еді. Тракторшының туыстары бұл жаңалыққа наразы болып, мемлекеттік көмектен айырмауды сұрады.
Осыған дейін қаза тапқан 14 орманшының отбасыларына 7 млн теңгеден, әр балаға 2 млн теңгеден бөлінетіні айтылған.
