Абай облысының әкімі Нұрлан Ұранхаев абаттандыру мен көгалдандыру жұмыстарының сапасына қатысты тұрғындар тарапынан түскен шағымдар бойынша Семей қаласындағы бірқатар демалыс орындарын аралады. Облыс басшысы жұмысы сапасыз әрі уақтынан кешігіп жатқан мердігерлерге қатаң ескертулер жасап, қала әкімдігіне, қажет болған жағдайда, басқа мердігерлерді де тарту мәселесін қарастыруды тапсырды.
Әйгерім СӘРСЕНҚАЛИ,
«Semeı tańy»
Облыс әкімі Нұрлан Ұранхаев алдымен 2019 жылы ауқымды қайта жаңартудан өткен Орталық саябаққа барды. Саябақта жаяу жүргіншілер жолдары жөнделіп, орындықтар мен демалыс алаңдары, спорт тренажерлері, шағын сәулет нысандары және балалар ойын алаңдары орнатылған болатын. Велосипед жолдары жасалып, тақтатас төселді.
Дегенмен демалыс орнында жөндеу жұмыстары әлі де жүргізіліп жатыр. Мұнда қазіргі күні жұмыс істемей тұрған субұрқақты жөндеп, көгалдандыру жоспарланған. Бұл жұмыстарға мердігер мекеме «Зеленстрой Семей» ЖШС жауапты. Алайда саябақта көгал әлі өсірілмепті.
— Менің мамандығым — агроном, жақсы газон шығу үшін тұқымды тамыздың 10-нан кейін себу керек. Қазір сепсек, шықпай қалады,- деп жауап берді мұның мәнісін сұраған аймақ басшысына саябақты күтіп ұстауға жауапты «Зеленстрой Семей» ЖШС өкілі Мұратхан Сәкенов. Бұл жауап аймақ басшысының көңілінен шықпады.
— 10 тамыздан кейін деген не сөз? Үйімнің ауласындағы жазда себілген газондарды көрсетейін онда. Ақша бөлінді, бірақ жұмыс нәтижесі жоқ. Жұмысты атқара алмаса, басқа мердігерге тапсыру керек,- деп мекеме жұмысын сынға алған Нұрлан Тельманұлы қала әкімі Нұрбол Нұрсағатовқа кемшіліктерді жедел түрде жоюды тапсырды.
Бір бұл емес, жаздың алғашқы айы аяқталуға шақ қалса да мұндағы субұрқақтың әлі іске қосылмағаны қынжылтады. Облыс әкімі айтқандай, қыркүйек айында іске қосылатын субұрқақтың қажеті шамалы.
Жөндеу жұмыстары ұзаққа созылған тағы бір нысан – Жеңіс саябағы. Мұндағы жөндеу жұмыстары жуырда ғана басталды десек те, біраз шаруа істеп үлгеретін уақыт болды. Жұмыс баяу жүріп жатқаны бірден көзге түседі.
Аймақ басшысы қала әкімі мен мердігерге қатаң талап қойды.
— Мұндай қарқынмен, жұмыс мерзімінде аяқталмайды. Егер алған міндеттемелерін орындай алмаса, тапсырысты орындайтын басқа мердігер табыңыздар!- деді облыс басшы.
Облыс басшысы арнайы барған кезекті нысан — Мұхтар Әуезов даңғылындағы «Абай Жолы» жаяу жүргіншілер аймағы. Бұл аллеяны ұлы ақынның 175 жылдығы қарсаңында Алматы облысы өз қаражатына абаттандырған болатын. Әуезов пен Селевин көшелерінің қиылысынан ет комбинатына дейін созылып жатқан аллея — сол жағалау тұрғындары жиі баратын демалыс орны. Алайда жаяу жүргіншілер аумағын күтіп ұстауда кемшілік жетіп артылады. Бұл орынды күтіп ұстауға жауапты — тағы да сол «Зеленстрой» ЖШС. Мұнда көргеніміз ыстықтан сарғайып кеткен көгал мен қурап қалған ағаштар болды. «Зеленстрой» ЖШС басшылығы тағы да қатаң ескерту алды.
Бұл күні облыс әкімі әскери техникалар паркіне де барды. 2008 жылы ашық аспан астында ашылған бірегей мұражай экспонаттары «Шығыс» өңірлік қолбасшылығының Семей гарнизоны жеке құрамының күшімен жинақталған. Мұнда Ұлы Отан соғысы жылдарында, одан кейінгі уақытта да пайдаланылған жауынгерлік техниканың үлгілері бар. Әскери саябақ орналасқан аумақ қала басшылығына тиесілі. Нұрлан Тельманұлы айтқандай, «Шығыс» өңірлік қолбасшылығы саябақ орналасқан аумақты өз меншіктеріне алуға ниетті болса, жөндеу жұмыстары жүргізілген соң осы мәселе қарастырылмақ.
Аймақ басшысы Павлодар тас жолында орналасқан бейіттер аумағында да болды. Мұнда жерді заңсыз иелену проблемасы өзекті болып тұр. Аумақта 100 гектар жер бар, оның 17,4 гектары меншік иелеріне тиесілі болса, қалғаны заңсыз пайдаланылып отырғаны белгілі болды. Нұрлан Ұранхаев заңсыз иеленіп отырған азаматтардан жерлерді қалаға қайтарып, бейіттер аумағын қоқыстан тазартуды тапсырды.
Осыдан соң аймақ басшысы Мирный кенті аумағындағы Ертіс өзені жағалауына ат басын бұрды. Жағалаудың тазалығы сын көтермейді, тағы да ескерту.
Осы аумақта орналасқан балалар алаңқайы да Нұрлан Тельманұлының назарынан тыс қалмады. Аймақ басшысы қала әкіміне ойын алаңын да жөндеуден өткізуді тапсырды.
Бұл күнгі жұмыс сапарында облыс басшысы жақында қолға алынған Би Боранбай, 11 «А» мекенжайындағы көп қабатты үйдің ауласын абаттандыру жұмыстарының барысымен танысты. Қазіргі таңда мұнда құбыр тартылып жатыр. Қала әкімі Нұрбол Нұрсағатовтың айтуынша, ауладағы жөндеу жұмыстары тамыз айында аяқталады.
Келесі кезекте Нұрлан Тельманұлы Селевин көшесінде орналасқан 38, 40 үйлердің ауласын барып көрді. Топырағы борпылдап, шаңы көтеріліп жататын бұл аулалар да абаттандыруды қажет етіп тұр.
Тұрғындарға мейлінше жайлы жағдай туғызу қажеттігін ескерткен облыс басшысы аталған аулаларды абаттандыру тізіміне қосуды тапсырды.
Айтылған сын мен ескертулерден жауапты бөлімдер мен мердігерлер қорытынды шығарып, кемшіліктерді түзетеді деген ойдамыз, дегенмен алда көре жатармыз.
