Жуырда ғана үшемдер дүниеге келген Жолдыбаевтар отбасына Семей қаласынан үш бөлмелі пәтер берілді.
Жадыра ТӨЛЕГЕНҚЫЗЫ,
«Semeı tańy»
Абай облысында алғаш рет үшем (екі қыз, бір ұл) дүниеге келгенін шілде айының басында газетімізде жазған болатынбыз. Бес бала тәрбиелеп отырған көп балалы отбасы — Қалбатау ауылының тұрғындары Аида мен Амангелді Жолдыбаевтар Жаратқанның сыйымен бірден сегіз баланың ата-анасы атанған болатын. Араларын небәрі бірер минут бөліп тұрған нәрестелерге Бегімай, Бек-Мұхаммед, Бегайым есімдері берілді.
Үшемдердің бесік тойына арнайы келген Абай облысы әкімінің кеңесшісі Жарқын Жұмаділов, қоғамдық даму басқармасының басшысы Айдар Садырбаев аймақ басшысы Нұрлан Тельманұлының құттықтауын жеткізіп, Семей қаласынан үш бөлмелі пәтер кілтін табыстады.
— Абай облысы құрылғалы Жарма ауданында алғаш рет дүниеге үшем келді. Бұл – үлкен қуаныш, Жаратқанның тамаша тартуы. Сәбилердің дендері сау, жолдары ашық болсын! Абай ақын айтқандай, «атасының емес, адамзаттың баласы болсын,- деп ақжарма тілегін білдірді Абай облысының қоғамдық даму басқармасының басшысы Айдар Садырбаев.
Жарма ауданының әкімі Жарқынбек Байсабыров та үлкен әулетті қуаныштарымен құттықтап, жерлестері атынан құрмет көрсетіп, сыйлықтар тарту етті. Сәбилердің өмірі жарқын болсын деген ақ тілегін айтып, жағымды жаңалыққа қолдау көрсетіп, игілікті іске бастамашы болған облыс әкімі Нұрлан Ұранхаевқа аудан халқы атынан ризашылығын жеткізді.
Сәбилердің болашағы жарқын болсын!
