Абай облысында жаңа оқу жылында 40 мыңға жуық оқушы тегін тамақпен қамтылады, деп хабарлайды ҚазАқпарат тілшісі.
Абай облысы әкімдігінің мәліметіне сүйенсек, өңірдегі білім беру ұйымдарында алдағы қыркүйек айынан бастап бастауыш сынып оқушылары әлеуметтік жағдайына қарамастан тегін ыстық тамақпен қамтамасыз етіледі. Бұл мақсатта жергілікті бюджеттен 1,2 миллиард теңгеге жуық қаражат бөлінді.
«Облыс бойынша барлығы 40 мыңға жуық бала тегін тамақпен қамтылады. Қазіргі уақытта дайындық жұмыстары жүргізіліп, ас мәзірі бекітіліп жатыр. Мәзірде құрамында балалардың жасына, физиологиялық қажеттіліктеріне сәйкес келетін тамақ өнімдері болуы тиіс. Сондай-ақ бастауыш сынып оқушыларымен қатар балабақшадағы көпбалалы отбасынан шыққан 5700 бала тегін тамақтанады», — делінген ақпаратта.
Жұмыс барысын тексеру мақсатында мектептерде Абай облыстық Білім басқармасының қызметкерлері, санитарлық-эпидемиологиялық қызмет өкілдері мен ата-аналар кіретін мониторингтік топ құрылмақ.
