Қыркүйек айының 26 күні Семей қаласындағы Абай атындағы драма театрында «Театр ВТ»-ның (Business Theatre) «Сыныптастар. Өмір сабақтары» атты спектаклі қойылады. Осыған орай Абай облысының өңірлік коммуникациялар қызметінде баспасөз конференциясы ұйымдастырылып, театр директоры Айгүл Сұлтанбекова БАҚ өкілдеріне қойылым жайлы айтып, театр тарихымен таныстырды.
Асылхан САДАҚБАЕВ,
«Semeı tańy»
Өзегін өмірден алып, талғампаз көрерменнің көңілінен шыға білген аталған қойылым халықаралық фестивальдерге қатысып, Қазақстан театр өнерін әлемге танытып, еліміздің мәртебесін көтеріп үлгерген екен. Санкт-Петербург қаласында өткен «Алтын маска» халықаралық фестивалінде “Сыныптастар. Өмір сабақтары” қойылымы 149 спектакльдің арасынан бірауыздан жоғары бағаланып, бас жүлдені жеңіп алыпты.
— Қадірлі семейліктер, жолдастар, кездесуге келгендеріңіз үшін алғысымыз зор. Семей — менің туған қалам. Осында бойжеттім, ата-анам осында тұрады. 10 жыл бұрын Алматыда құрылған тәуелсіз театрмен “ Сыныптастар. Өмір сабақтары” атты қойылыммен келіп отырмыз. Бәріміздің де сыныптастарымыз бар. Бұл спектакль сіз бен біз жайлы, шынайы өмірден алынған. Күнделікті өмірде бәріміз де таңдау жасаймыз, қателесеміз. Сол қателіктен сабақ аламыз. Спектакльде қадірін білмей кейіген кей уақыттарда тілдеп алатын өмірдің адамға қаншалықты қымбат екені көрсетіледі. Махаббат, достық, адамдар арасындағы қарым-қатынас суреттеледі,- деді Айгүл Сұлтанбекова.
Көрермен махаббаты арқылы келген тірнектеп жиған абыройдың мәртебесі бәрінен биік. Бұл тұрғыдан алғанда Business Theatre халық қолдауынан кенде емес. Театрдың гастрольдік сапарын өнер сүйер қауым тағатсыздана күтіп отыр.
— Өзім де бұл спектакльді талай мәрте көрдім, әртістерді де жақсы танимын. Соған қарамастан қойылымды әрбір көрген сайын сезімге бой алдырып, көз жасыма ерік беріп қоямын. Бейтаныс, Қазақстаннан келген шағын, әрі танымал емес театрдың халықаралық фестивальден бас жүлде алуы үлкен таңданыс тудырды,- дейді театр директоры.
Айгүл Мұратқызының айтуынша, гастроль идеясы мүлдем кездейсоқ, күтпеген жерден пайда болған.
— Біз қойған спектакльге онлайн билет жүйесі Тикетонның өкілі көрермен болған екен. Ол бізге хабарласып: «Осы қойылымды халыққа мейлінше көбірек көрсету керек»,- деді. Сөйтіп, Тикетон мен Jam.kz бастамасымен Қазақстанның 4 қаласын аралап өнер көрсетеміз,- дейді театр директоры.
Әлемде кең тарап, етек алған «арт-бизнес» деген концепция бар. Бұл мемлекет қолдауынсыз, өз қаражаты арқылы өнерін елге насихаттап, мәдениет нарығында бренд болып қалыптасу. Елімізде өнер саласында жаңашылдыққа жол ашқан «Театр ВТ» Семейге ат басын бұрған екен. Қадамдарына сәттілік тілей отыра, қаламыздың өнер сүйер қауымын «Сыныптастар. Өмір сабақтары» спектаклін көруге шақырамыз.
— Бұл спектакль ешкімнің жан-дүниесін бей-жай қалдырмайды. Көрермендер арасынан алғаш рет ер адамның жылағанын көрдім,- деген Айгүл Мұратқызы қойылым жан-дүниесіне мәдени төңкеріс іздеген адамды рухани биікке шығарып, жаңа әсермен қауыштырады деп сендірді.
