«AMANAT» партиясының Абай облыстық филиалында депутаттар, сарапшылар қауымдастығы, зиялы қауым, қоғам белсенділері, кәсіпкерлер, жастар және партия белсенділерінің қатысуымен «TALQYLAU» диалог алаңының кезекті отырысы өтті.
Басқосуда «AMANAT» партиясы Абай облыстық филиалының атқарушы хатшысы Сейілбек Ысқақов Мемлекет басшысы «Әділетті Қазақстанның экономикалық бағдары» Жолдауында қоғамдағы барлық өзекті мәселелерді қозғағанын атап өтті.
Диалог алаңының жұмысына Абай облыстық мәслихатының депутаты, «AMANAT» партиясының депутаттық фракциясының мүшесі, «ABAI AIMAQ MEDIA» ЖШС директоры Р.Молдашева, заң ғылымдарының докторы, профессор, Әлихан Бөкейхан университетінің проректоры Майгүл Матаева, Абай облыстық мәслихатының депутаты, «AMANAT» партиясының депутаттық фракциясының мүшесі, «Силикат» ЖШС директорының орынбасары Қ.Қасенов «AMANAT» партиясы Абай облыстық филиалы жанындағы Сыбайлас жемқорлыққа қарсы іс-қимыл жөніндегі кеңестің төрайымы, Ядролық медицина және онкология орталығының директоры Т.Белихина қатысты.
Абай облыстық мәслихатының депутаты, «AMANAT» партиясының депутаттық фракциясының мүшесі Риза Молдашева жаңа Жолдаудағы негізгі басымдықтарға тоқталды. «Жолдау — бұрын басталған реформалардың жалғасы. Маңызды құжатта еліміздің дамуына, тағдырына қатысты ауқымды мәселелер көтерілді. Жолдауда айтқан барлық мәселелер қоғам сұранысына сай келеді. Қазір қазақстандықтарды толғандыратын ең басты мәселе – экономиканың дамуы, халықтың әл-ауқатын арттыру. Елді баға мен тарифтердің өсуі алаңдатып отыр. Президент Жолдауда көптің көкейінде жүрген осы сұрақтарға нақты жауап берді, – деді Риза Асанқызы.
Облыстық маслихат депутаты Қ. Қасеновтің айтуынша, Президент өз Жолдауында ауыл шаруашылығы өнімдерін қайта өңдеуді қолға алу, отандық агрофирмаларды ірілендіруді ынталандыру, өзара тиімді шарттарда трансұлттық корпорацияларды тарту жағына салық саясатын қайта қарауды қамтитын Қазақстанның агроөнеркәсіптік кешеніндегі нақты серпілісті іске асыру мақсаты жөнінде нақты міндеттер қойды.
Заң ғылымдарының докторы Майгүл Хафизқызы «Президент Жолдауда балаларға, жас қазақстандықтарға ерекше назар аударып, олардың сапалы білім алу, техникалық және жұмысшы мамандықтары бойынша білікті кадрлар даярлау мәселесін көтергені қуантады» деп өз пікірін ортаға салды.
Т.Белихина Жолдаудағы атом энергетикасын дамыту экономикалық қана емес, саяси мәселеге де айналғанын, бұл сұрақты жалпыұлттық референдумда талқылау дұрыс шешім екенін айтты. Қатысушылар тарапынан қойылған сұрақтар кездесу барысында толықтай талқыланды.
«TALQYLAU» диалог алаңын құру бастамасы былтыр 1 наурызда «AMANAT»-тың кезектен тыс съезінде партиялық трансформация бағдарламасындағы тармақтардың бірі ретінде айтылған еді. Азаматтарды толғандырған өзекті мәселелерді шешу бойынша ұсыныстар әзірлеу үшін сарапшылар, депутаттар, мемлекеттік органдар өкілдері аталған алаңда тұрақты негізде бас қосады.
Өз тілшіміз
