Үлкенбөкен ауылында жеке кәсіпкер Ринат Солтабаев жеке қаражаты есебінен дәрігерлік амбулаториялық пункт ашылды.
Айтолқын Саматова,
«Semeı tańy»
Дәрігерлік амбулаторияның ашылу салтанатына қатысқан аудан әкімі Ділдәбек Оразбаев үлкенбөкендіктерді құттықтап, осы нысанның құрылысына ұйытқы болып, өз қаражатына салған Ринат Тұрарбекұлына алғысын білдірді.
— Жалпы әрбір Тәуелсіз ел үшін ең қымбат құндылық — азаматтарының денсаулығы. Денсаулық – елдің тұрақтылығын, ұлттық қауіпсіздігін қалыптастырады. Мемлекет Басшысы Қасым-Жомарт Кемелұлы “Үш жыл ішінде барлық ауылдық елді мекенді фельдшерлік-акушерлік пункттермен және дәрігерлік амбулаториялармен қамтамасыз ету қажет” деп нақты тапсырма берген болатын. Осы орайда, ауданымыздың Шәріптағай, Мамай, Биғаш, Үлгілімалшы, Үшкемей, Қарамойыл ауылдарында ауылдық дәрігерлік амбулаториялар салу жоспарлануда. Қазіргі таңда құжаттары рәсімделуде, келесі жылы құрылыс басталады,- деді аудан әкімі Д.Оразбаев.
Жалпы биыл Үлкенбөкен ауылында бұрын-соңды болмаған жұмыстар атқарылуда. Атап айтқанда, мектеп ауласы мен балабақшаға дейінгі жолға асфальт пен брусчатка төселіп, мектеп қасбеті боялды. Одан бөлек, Үлкенбөкен ауылының екі көшесі орташа жөндеуден өтті. “Ауыл — ел бесігі” жобасы аясында 110 көше жарығын орнату жоспарланған.
Сонымен бірге, жомарт жанды азамат “Тайм” шаруа қожалығының басшысы Ринат Тұрарбекұлы өз қаражаты есебінен Үлкенбөкен ауылында ауылдық мешіт пен 400 орынға арналған қатымхана құрылысын бастады. Жақын арада бұл нысандар да қолданысқа берілмек.
