Абай облысы әкімдігінде кеңейтілген кеңес өтті. Күн тәртібінде облыс кәсіпорындарындағы жалақы бойынша берешек мәселелерін шешу, аймақтағы кәсіпорындарда орташа жалақы мөлшерін ұлғайту, өндіріс орындарындағы апатты жағдайлардың алдын алу және жарақаттануды азайту жөніндегі шаралар қаралды.
Жиын барысында облыс әкімі Нұрлан Ұранхаев хаттама негізінде Бақылау басқармасына, жұмыспен қамту және әлеуметтік бағдарламаларды үйлестіру басқармасына қала және аудан әкімдерімен, кәсіпорын басшыларымен бірлесіп жұмысшылар алдындағы жалақы берешектерін толықтай өтеуге байланысты тиісті шараларды қабылдауды тапсырды.
Берешек өтелмеген жағдайда Бақылау басқармасына қолданыстағы заңнамаға сәйкес жұмыс берушілерге қатысты тиісті шаралар қабылдауды жүктеді.
Қалалар мен аудандардың әкімдері, облыстық бақылау, жұмыспен қамту және әлеуметтік бағдарламаларды үйлестіру басқармалары кәсіпорындармен бірлесіп жалақы деңгейі төмен кәсіпорындарда, олардың экономикалық көрсеткіштерін негізге ала отырып, орташа жалақыны республикалық деңгейге және кәсіпорындардағы ең төменгі жалақы көлемін республикада бекітілген ең төменгі жалақы деңгейіне дейін жеткізу жөнінде қажетті шаралар қабылдауы қажет.
Бұдан бөлек аймақ басшысы бақылау басқармасына Өнеркәсіптік қауіпсіздік комитетінің Абай облысы бойынша департаментімен бірлесіп қолданыстағы заңнамаға сәйкес жарақат алу қаупі жоғары кәсіпорындарға тексеру жүргізуді тапсырды.
Абай облысының әкімдігі
