Семей қаласындағы Торайғыров көшесінде балаларға арналған жаңа ойын алаңы пайдалануға берілді. Сейсенбі күні алаңның ашылу салтанаты өтті. Мерекелік шараға қала әкімінің орынбасары Рамиль Досмағанбетов қатысты.
С.ЖАЙСАНБЕКОВА,
«Semeı tańy»
Қызылды-жасылды шарлармен, жалаушалармен безендірілген алаң іші балақайлар мен ата-аналарға, ардагерлер және көше тұрғындарына лық толды. Тұрғындардың дене шынықтырумен айналысуына және бос уақыттарын тиімді өткізулеріне жағдай жасау мақсатында салынған қоғамдық кеңістікте заманауи футбол алаңы мен балалар ойын алаңы және жаттығу алаңы бар. Балалар алаңында әткеншектер, сырғанақ, өрмелеуіш, төбесі жабылған ойын құрылғылары орнатылған. Ойын алаңы түрлі түсті бояумен безендіріліп, балалар ойнайтын алаңға жасанды көгал салынған. Мәз-мейрам болған балалардың қуанышында шек жоқ.
Балаларға қуаныш сыйлаған бұл ерекше ойын алаңының ашылу салтанатында тұрғындар сөз алып, қала әкімдігіне алғыстарын білдірді.
Ойын алаңының лентасы қиылып, шашу шашылды.
– Еліміздің келешегі – бүгінгі ойын балалары. Алаңдағы жабдықтардың барлығы жоғары сапалы. Бұрын балаларды ойнату үшін Орталық алаңға баратынбыз. Енді, міне, өзімізде де демалатын орын бар. Балаларымды күнде осында алып келемін. Тұрғындардың атынан алғысымды айта отырып, осындай жақсы істердің куәсі бола берейік деген тілегімді білдіремін. Енді балаларымыз өздеріне арнап салынған алаңды көздің қарашығындай сақтап, дұрыс пайдаланады деп сенеміз, – дейді тұрғындардың бірі М.Адамбаева.
Ата-ана үшін баласының қуанышты жүзін көруден, шаттанған әрбір сәтіне куә болудан асқан бақыт жоқ.
Алаңның ашылу салтанатында Қалалық Мәдениет сарайының әншілері әуезді әндерін шырқады. Мультфильм кейіпкерлері кейпінде киінген аниматорлар балалармен ойындар ойнап, тамаша көңіл-күй сыйлады.
Айта кетерлігі, көктем айында қала әкімі Нұрбол Нұрсағатовтың қабылдауына келген тұрғындар аталған аумаққа қоғамдық орын салып беру туралы өтініш айтқан болатын. Мердігер ұйым екі ай көлемінде тиісті жұмыстарды жүргізіп, қазан айында құрылыс жұмыстарын аяқтады.
Бүгін Семей қаласының мәдениет бөлімі аудан тұрғындарына мерекелік көңіл-күй сыйлап, концерттік бағдарламаларды ұсынды.
