22 желтоқсан күні Қалалық мәдениет сарайында «Жыл үздігі – 2023» атты Абай облысының үздік спортшылары мен спорт саласындағы қызметкерлерін салтанатты марапаттау рәсімі өтті.
Сымбат ҚАЙРАТҚЫЗЫ,
«Semeı tańy»
Іс-шараға Абай облысының әкімі Нұрлан Ұранхаев, Абай облысы әкімінің бірінші орынбасары Шалқар Байбеков, Абай облысының дене шынықтыру және спорт басқармасының басшысы Ержан Абылқасымов қатысты. Жыл сайын дәстүрлі түрде үздіктерді қорытындылайтын шараға Әлем және Азия чемпионаттарында көк туымызды желбіретіп жүрген спорт саласының майталмандары және олардың жаттықтырушылары жиналды.
Салтанатты рәсім басталар алдында облыс әкімі Нұрлан Ұранхаев құттықтау сөз сөйлеп, облыстағы спорттың дамуына қосқан үлесі және жарқын жеңістері үшін сала өкілдеріне алғысын білдірді.
Салтанатты кеш барысында жыл қорытындысы бойынша олимпиадалық, олимпиадалық емес, ұлттық және мүмкіндігі шектеулі жандарға арналған спорт түрлерімен айналысушылар, жаттықтырушылар, спорт ардагерлері облыс әкімінің қолынан алғыс хат алды.
Атап айтқанда, қазақ күресінен халықаралық дәрежедегі спорт шебері Зарина Сарипова, шаңғы жарысынан Қазақстан Республикасының спорт шебері Ернар Нүрсбеков, «Елімай» футбол клубының капитаны Еркебұлан Нұрғалиев, пара дзюдодан халықаралық дәрежедегі спорт шебері Ерлан Конкиев, жеңіл атлетикадан ҚР еңбек сіңірген спорт шебері Ольга Хижнякова, ММА-дан ҚР спорт шебері Сайран Сағындықов, Еуропа кубогының бірнеше дүркін жеңімпазы Берікбол Жұманбеков, тоғызқұмалақтан Қазақстан Республикасының спорт шебері Аяна Исахан марапатталса, «Ең үздік спорт клубы» аталымын «Елімай» футбол клубы жеңіп алды. Спортшыларға 500 000 мың мен 250 000 мың теңге ақшалай сертификат және статуэтка табысталды.
Сондай-ақ грек-рим күресінен Қазақстан Республикасының халықаралық дәрежедегі спорт шебері, Азия чемпионатының күміс жүлдегері, Қазақстан Республикасының Жазғы спартакиадасының жеңімпазы, «Токио» олимпиада ойындарының қатысушысы, «Париж 2024» жазғы олимпиада ойындарына жолдама иегері, «2023 жылдың жазғы олимпиадалық спорт түрлерінің үздік спортшысы» аталымының иегері жеңімпазы, Нұрсұлтан Тұрсыновқа пәтер кілті табысталады.
«2023 жылдың үздік аудан жаттықтырушысы» номинациясын Айдар Қайрбаев алса, «2023 жылдың Паралимпиадалық спорт түрлерінің үздік жаттықтырушысы» номинациясы Мадина Тоқтамысоваға бұйырды. Айбек Жұманбаев «2023 жылдың ұлттық спорт түрлерінің үздік жаттықтырушысы», Махаббат Советханқан «2023 жылдың олимпиадалық емес спорт түрлерінің үздік жаттықтырушысы», Ерик Жұмабеков
«2023 жылдың үздік спорт төрешісі» атанды.
Шыңғысбек Тұрсынов «Құрметті спорт қызметкері» төсбелгісімен, Қайрат Чармұхаметов «Дене шынықтыру және спортты дамытуға сіңірген еңбегі үшін» төсбелгісімен, Мұхсин Нұртазин және Юрий Друзь «Еңбек ардагері» медальдарымен марапатталды.
Мерекелік шара концерттік бағдарламаға ұласты.
