Апта бейсенбісінде Абай облысының өңірлік коммуникациялар қызметі алаңында өткен баспасөз мәслихатында Семей қаласының жаңадан әзірленген бас жоспарының жобасы таныстырылды.
Әлібек КЕМЕЛХАН,
«Semey tany»
Семей қаласы сәулет және қала құрылысы бөлімінің басшысы Дархан Сейтханов Бас жоспарға қатысты бірқатар мәселелерге тоқталды. Жаңа жоспарға сәйкес, Семей қаласы жоспарлы екі ауданға бөлінетін болады. Аудандар Ертіс өзені арқылы бөлінеді. Әрбір жоспарлы аудан, жаңа Бас жоспарға сәйкес, төрт тұрғын ауданнан тұрады. Олар, өз кезегінде, темір жол магистральдарымен бөлінеді.
Дархан Сейтханов атап өткендей, қаланың орталық бөлігінде негізгі әкімшілік-іскерлік және қаржы мекемелері, мәдени-тұрмыстық қызмет көрсету нысандары, оқу орындары, темір жол және автомобиль вокзалдары, ғибадатханалар, сонымен қатар ірі сауда нысандары шоғырланған.
— Жалпы, Бас жоспар бойынша, қала орталығының солтүстік-батыс жағында Батыс тұрғын ауданы орналасқан. Онда тұрғын үй және өндірістік-коммуналдық құрылыс шоғырланған. Солтүстік-шығыс жағынан Ақсай тұрғын ауданы жалпықалалық орталыққа іргелес орналасқан. Бұл ауданда, бірқатар өндірістік және коммуналдық кәсіпорындармен қатар, жеке секторға басымдық берілген. Қазіргі уақытта Шығыс тұрғын ауданының шығыс бөлігін саяжайлар алып жатыр, — деп атап өтті Дархан Сейтханов
Бөлім басшысы қала іргесіндегі саяжайлар мәселесіне де тоқталды. Жер заңнамасына сәйкес, қала шегінде бау-бақша өсіруге арналған учаскелер берілмейді. Дегенмен бас жоспарды әзірлеушілер қаланың саяжай алаптарын одан әрі дамыту жөнінде ұсыныс әзірлеуде.
Дархан Бақытұлы атап өткендей, кейбір саяжай алаптары, жаңа Бас жоспарға сәйкес, дамытуға жататын болады.
— 2011 жылғы бас жоспарда олар саяжай алаптары ретінде көрсетілді. Жаңа жоспар бойынша кейбір саяжай алаптары одан әрі дамытылуға жатқызылып, аз қабатты және орта қабатты ғимараттар салынады. Нақты жоспарлау жобасын әзірлеу бұл саяжайларды тұрғын үй алаптарына айналдыруға мүмкіндік бермейді. Алайда жаңа бас жоспар әлі бекітілген жоқ, бізге 4 наурызға дейін уақыт берілді. Осы уақыт ішінде саяжайларды жаңа бас жоспарда қалай көрсетеміз, осы туралы ұсыныс жасаймыз, — деп атап өтті спикер.
Жаңа бас жоспар бекітілгенге дейін және оны жүзеге асыру басталғанға дейін саяжайлар мәселесін бір жақты шешу әзірге мүмкін емес.
— Біз бұл мәселені жобалық институтпен бірлесіп, қалаға залал келтірмеу жағын да ойластырып, тұрғындарға ыңғайлы нұсқаны ұсыну үшін әлі де зерттеп жатырмыз. Егер бас жоспар дамытуға бекітілсе, біз тұрғын үй құрылысының, іскерлік және әкімшілік ғимараттардың, әлеуметтік объектілердің қай жерде болатынын анықтайтын нақты жоспарлау жобасын әзірлейміз. Осыдан кейін саяжайлардың орындары анықталады, — деді Дархан Бақытұлы.
Семей қаласының жаңа бас жоспарын әзірлеушілер мен жобалаушылардың айтуынша, тарих және сәулет ескерткіштері үшін қорғау аймақтары белгіленіп, мемлекет тарапынан қадағалауға алынатын болады.
— Жаңа бас жоспарды іске асыру кезінде біз «Тарих және мәдениет объектілері мен ескерткіштері» бөлімін де қарастырдық. Бұл бөлімде біз ескерткіштер ретінде ресми түрде танылған нысандар туралы мәліметтерді жандандырамыз. Жаңа бас жоспар аясында оларды арнайы қорғау аймақтарына орналастырамыз, — деп атап өтті спикер.
Жобалаушылар қатарындағы Нұрбек Аужанов тарихи құрылыс пен мұраны сақтау Семей қаласының жаңа Бас жоспарына қатысты негізгі мәселелердің бірі екенін айтты.
— Семей — тарихы бай қалалардың бірі. Маңыздылығы бойынша еліміздегі Орал, Петропавл қалаларымен салыстыруға болады. Бас жоспардың құрамында жеке корғау аймағы бар тарихи және сәулет ескерткіштерінің тізімі болады. Қаланың орталық бөлігі, сонымен қатар бірнеше шағын аудандар да тарихқа өте бай. Бас жоспардың бір ерекшелігі – қаланың өмірінен сыр шертетін тарихи құрылыстарға баса назар аударылады, — деді Нұрбек Аужанов.
Айта кететіні, жаңа Бас жоспар әлі қабылданған жоқ, ал ол бекітілгеннен кейін егжей-тегжейлі жоспарлау шаралары жүргізілетін болады.
— Бас жоспар қаланың жалпы даму стратегиясын айқындайды. Басты мақсаты — алаңдарды, қаланы аймақтарға бөлу. Әрі қарай біз әрбір нысан бойынша, әр көше бойынша нақты жоспар дайындаймыз, — деп қорытындылады сөзін Дархан Сейтханов.
Брифинг соңында бөлім басшысы БАҚ өкілдері тарапынан қойылған бірқатар сауалдарға жауап қайтарды.
