27 ақпан – Дүниежүзілік үкіметтік емес ұйымдар күні. Осыған орай Абай облысы әкімі аппаратының басшысы Жасұлан Сәрсебаевтың қатысуымен алқалы жиын өтті.
Жадыра ТӨЛЕГЕНҚЫЗЫ,
«Semeı tańy»
Үкіметтік емес ұйымдар әлеуметтік мәселелерді шешуде және азаматтық бастамаларды жандандыруда мемлекетіміздің ең сенімді тірегі іспеттес. Мемлекетіміз өз тәуелсіздігін алғаннан бері қоғамдық ұйымдар еліміздің әлеуметтік-экономикалық дамуына зор үлес қосып келеді.
Бүгінде елімізде 23 мыңнан астам үкіметтік емес ұйым бар, оның 18 мыңы белсенді жұмыс істейді. Ал Абай облысы бойынша 500-ден астам азаматтық қоғам институттары тіркелген.
Дөңгелек үстел барысында Абай облысы әкімі аппаратының басшысы Жасұлан Сәрсебаев ядролық қаруға қарсы «Семей-Невада» қозғалысы Қазақстандағы тұңғыш үкіметтік емес ұйым екенін атап өтті.
— Біз бүгін Дүниежүзілік ҮЕҰ-дар күнін атап өтудеміз. Үкіметтік емес ұйымдар — қашанда азаматтық қоғамның алдыңғы қатарында болып, белгілі бір мәселелер бойынша халықтың ұстанымын білдіріп келеді. Азаматтық қоғам мен Үкімет арасындағы алтын көпір де осы – үкіметтік емес ұйымдар. Сіздер әлеуметтік мәселелерді шешу мен азаматтық бастамаларды жандандыруда мемлекеттің сенімді серіктесі болып келесіздер. Мемлекет басшысы да ҮЕҰ-ның рөлін ерекше атап көрсеткен. Осы орайда Қазақстандағы азаматтық қоғам дамуының басында тұрған, биыл құрылғанына 35 жыл толған «Невада-Семей» қозғалысының басы-қасында жерлестеріміз тұрғанын атап өту қажет. Өткен жылдан бері күш-жігеріміз бен барлық ресурстарды біріктіріп, Абай облысында бірыңғай ҮЕҰ орталығын құру жөнінде келіссөздер жүргізіп келеміз. Оның басты міндеті — ҮЕҰ қызметіне бөлінген қаражатты жинақтау және оны басым бағыттарға сәйкес бөлу. Азаматтық сектордың даму деңгейі — қоғам өркениетінің көрсеткіші, сондықтан бұл өте маңызды,- деді Жасұлан Сәрсебаев.
Жиынға қатысушылар аймақтағы ҮЕҰ-ды дамытудың өзекті мәселелерін талқылап, үкіметтік емес ұйымдарға қатысты мәселелерді көтерді. Іс-шараға қатысушылар бала құқығын қорғау мәселесіне де тоқталды.
Дөңгелек үстел соңында Жасұлан Бірлікұлы ҮЕҰ жетекшілерін алғыс хаттармен марапаттады.
