Абай облысының әкімі Нұрлан Ұранхаевтың қолдауымен аудандық балалар мен жасөспірімдер спорт мектебінің Шар қаласындағы филиалына жаңа көліктің кілті салтанатты түрде табыс етілді. Салтанатты шараға облыстық дене шынықтыру және спорт басқармасының басшысы Ержан Абылқасымов, аудан әкімінің орынбасары Райым Нұрғалиев, мекеме ұжымы және ауыл тұрғындары қатысты.
Шар қаласы спортшыларының ұсыныс-тілектері ескеріліп, спорт мектебіне жаңа көлік беріліп отыр. Алдағы уақытта мекеменің тәрбиеленушілері спорттық іс-шараларға «Газель» автокөлігімен қатынайтын болады.
— Шар қаласы спорт мектебінің оқушыларының спортқа деген ынтасын арттыру мақсатында осындай игі істі қолға алдық. Олар байрақты бəсекелерде биік тұғырдан ғана көрінеді деген сенім зор, — деді Абай облыстық дене шынықтыру және спорт басқармасының басшысы Ержан Абылқасымов.
Жармалық спортшылар Жан Шыңғыс және Абдур-рахим Мұратхан Қазақстан Республикасының спорт шеберіне үміткері атағына ие болды. Оларды аудан әкімінің орынбасары Райым Нұрғалиев құттықтады.
— Шар өңірінің спорт тарихы да тым тереңде жатыр. Жерлестеріміз түрлі деңгейдегі жарыстарда аудан, облыс, республика намысын ойдағыдай қорғады. Атап айтқанда, қала тұрғыны Зарина Примак параармреслингтен 7 дүркін Азия чемпионы, 4 мәрте Әлем чемпионы. Ардагерлер арасындағы Азия чемпионатында Марат Қарақанов самбодан алтын медаль, Ақылбек Тұрсынбекұлы күміс жүлде иеленсе, бочча спортынан Кенжеқан Баймұратов республика біріншілігінің қола жүлдегері атанды,- деді аудан әкімінің орынбасары.
Бүгінгі күні қалалық спорт мектебінде 200-ге жуық жасөспірім 5 спорт түрі бойынша жаттығуда. Оларды 8 жаттықтырушы спортқа баулуда.
Наурыз мерекесімен тұспа-тұс келген шара волейболдан жасөспірім қыздар арасындағы аудандық жарыспен жалғасты.
