Рамазан айының құрметіне орай Көкпекті ауданының әкімі Ділдәбек Оразбаевтың бастамасымен өңірде «Қарызды өшір» атты қайырымдылық акциясы бастау алды.
Осман империясында Ораза айы кезінде бір жақсы дәстүр болыпты. Қасиетті ай басталып, халық ауыз бекітісімен ауқатты адамдар көше-көшені аралап дүкендерге кіріп, дүкеннің иесінен қарыз жазылған дәптерді сұрап, берешегі көп біреуді таңдап алады екен. Қарызын өтеп, әлгі дәптерден сыздыртып тастайды екен.
Көкпекті ауданында да Ділдәбек Тәжібайұлының бастамасымен бұл игі дәстүр бастау алды.
Акция аясында аудан азаматтары дүкендерге кіріп берешегі көп біреуді таңдап, қарызын жабуда. Аудан әкімінің өзі де осы акцияға қатысып, үлесін қосты.
Атап өтетін жайт, акция аясында тек көпбалалы отбасылардың, жалғызбасты қариялардың және жағдайы төмен отбасылардың азық-түлік үшін алған қарыздары өтелуде.
Бұл игілікті шара алдағы уақытта да өз жалғасын таппақ.
