Бейсенбі күні «AMANAT» партиясы Абай облыстық филиалы “Таза Қазақстан” жалпыұлттық науқаны аясында «Таза бейсенбі» республикалық экологиялық акциясына үлес қосты.
Акцияға “AMANAT” партиясы Абай облыстық филиалының Атқарушы хатшысы Нұржан Әбдікәрімов, облыстық мәслихат депутаттары Шалқар Жоламанов, Мерей Қарт, партияластар мен “Жастар рухы” ЖҚ белсенділері, жалпы 100 адам қатысты.
-Аманаттықтар үшін «Таза Қазақстан» игі үрдіске айналған тазалық акциясы. Әр бейсенбі сайын қаламызды тазалау үшін тазалық жұмыстарын жүргізіп, қоқыс шығарудамыз. Әр іс-шараға 100-ге жуық партия мүшелері, мәслихат депутаттар, “Жастар рухы” ЖҚ белсенділері қатысып, арнайы техникалар жұмылдырылуда. “AMANAT” партиясының әрбір қатысушысы абаттандыруға өз үлесін қосуда,- деді “AMANAT” партиясы Абай облыстық филиалының Атқарушы хатшысы Нұржан Әбдікәрімов.
Елді мекендер аумағын қоқыстан тазартуды, экологиялық жағдайын жақсартуды көздеген шара аясында алдын-ала барлық өңірлердегі елді мекендердің ластанған аумақтарының картасы әзірленген. Осы карта бойынша біздің өңірімізде Ертіс өзенінің Затон ауданы аумағындағы жағалауды таңдалған. Тазалық жұмысына белсенді қатысқан халық қалаулылары бұл игі шара екенін тілге тиек етті.
-Ұлтты ортақ іске ұйыстырып, елімізді көркейте түсу, халқымыздың экологиялық сана-сезімін дамыту мақсатында қолға алынған «Таза Қазақстан» акциясының мәні зор. Бұл ауқымды акция аймағымызда қарқынды түрде жүзеге асырылып жатыр. Елді мекендер абаттандырылып, қоқыстан тазартылуда. «Тазалық – денсаулық кепілі» демекші, бүгін қоршаған ортаны қорғауға, табиғатты аялауға үлес қостық,- деді облыстық мәслихат депутаты, Қазақстан Жазушылар одағы Абай облыстық филиалының төрағасы Мерей Қарт.
Акцияға қатысушылар жағалау аумағындағы 1,5 гектар аумақты тазартып, 100 қаптан аса қоқыс жинады. Облыстық филиал алдағы уақытта да тазалық жұмыстарын белсенді жүргізіп, әр тазаланған учаскеде тәртіп пен тазалықты сақтауды қамтамасыз ететін болады.
Ай-Керім СӘРСЕНҚАЛИ
