Семей қаласында таңғы сағат 7:00-ден бастап дауыс беру басталды.
№84 сайлау учаскесіне халық көптеп келе бастады. Дауыс беруге алғашқы келгендерге сыйлықтар табыс етілді.
Бірінші болып 18 жасқа енді толған, Әлихан Бөкейхан университетінің 2-курс студенті Данара Асқарбекова дауыс берді.
— Бүгінгі референдум біздің еліміздің болашағы үшін маңызды. Биыл алғаш рет дауыс беріп тұрмын. Ерекше сезімдемін. Қазақстанның болашағы біз сияқты жастардың қолында. Сондықтан еліміздің болашағына бейжай қарамай, өз таңдауымызды жасауымыз керек,- дейді Данара.
Осы сайлау учаскесінде алғашқылардың бірі болып, Халықаралық «Қазақ тілі» қоғамының Президенті Орал Шәріпбаев та дауыс берді.
— Республикалық референдумда өз таңдауымды жасау үшін дауыс беруге келдім. Алғашқылардың бірі болып дауыс беруді жөн санаймын, бұл менің әдетім. Барлық семейліктерді сайлауға белсенді қатысуға шақырамын. Дауыс беру азаматтық парызымыз деп білемін,- дейді Орал Шәріпбаев.
№84 сайлау учаскесі комиссия төрайымы Айнұр Мұратханның айтуынша, сайлаудың ашықтығы мен заңдылығын қамтамасыз ету үшін дауыс беру орындарында бейнебақылау жүргізілуде. Сондай-ақ дауыс беру барысын қадағалайтын бақылаушылар жұмыс істеп жатыр.
— Осы учаскеге 1484 сайлаушы тіркелген. Үй жайында өтініш бергендердің саны 52 адам. 18 жасқа толып, алғаш дауыс беретіндердің саны 50,- деді комиссия төрайымы.
Сымбат ҚАЙРАТҚЫЗЫ,
«Semeı tańy»
