33 учаскеде референдум талапқа сай өтіп жатыр
Бүгін елімізде маңызды науқан – референдум өміп жатыр. Референдум барысында азаматтар «Сіз Қазақстанда атом электр станциясын салуға келісесіз бе?» деген сұраққа жауап беріп, таңдау жасауда.
Семей қаласындағы Цементшілер кентінде орналасқан №33 учаскесінде референдум талапқа сай өтіп жатыр. №33референдум комиссиясының төрағасы Самат Қасымовтың айтуынша, алғашқы дауыс берушілерге сый-сыяпат та жасалған.
— Бізде барлығы 2 666 сайлаушы тіркелген. Үйде дауыс беруге 15 азамат өтініш берген. Сағат 12:00-ге дейін өтініш білдірушілердің саны артуы мүмкін. Таңғы 6-да учаске өз жұмысын бастады. Алғашқы дауыс берушілер сағат 7-ден бастап келіп жатыр. Алғашқы дауыс берушілерге сый-сыяпат жасадық. Жалпы тұрғындар белсенділігі байқалады,- деді Самат Қайратұлы.
Бақылаушылардың айтуларынша,учаскеде тәртіп бұзушылық әрекеттері орын алмапты.
-Бүгін референдум талапқа сай өтіп жатыр. Ешқандай құқық бұзушылық әрекеттері тіркелген жоқ. Халықтың белсенділігі байқалады. Алғашқы 2 сағатта 140 адам дауыс беріп үлгерді,- деді байқаушы Ақбота Тұмарова.
Белсенді тұрғындар қатарында «Қазақ күресі»бойынша халықаралық дәрежедегі спорт шебері, Абай облысы мәслихатының депутаты Айбек Нұғымаров дауыс берді.
— Бүгінгі референдумда өз дауысымды беру арқылы азаматтық борышымды орындадым деп ойлаймын. Әрбір азаматтың дауыс беруге қатысып, конституциялық міндетін атқаруы өте маңызды. Баршаңызға сәттілік тілеймін, — деді Айбек Нұғымаров.
Ай-Керім СӘРСЕНҚАЛИ
