Абай облысы мәслихатының төрағасы Қуаныш Сүлейменов референдумда дауыс берді
Абай облысы мәслихатының төрағасы Қуаныш Сүлейменов республикалық референдумға отбасымен келіп, №96 сайлау учаскесінде дауыс берді.
Мәслихат төрағасының айтуынша, бүгінгі таңда орын алып жатқан оң өзгерістер еліміздің жаңа белестерге көтерілуіне жол ашады. Әрбір азаматтың таңдауы – Қазақстанның болашағын қалыптастырудағы маңызды қадам.
— Бүгін еліміз үшін өте маңызды күн, отбасыммен бірге сайлау учаскесіне келіп, өз таңдауымды жасадым. Ел болашағы үшін дауыс беруге белсенді қатысу — азаматтық борышымыз. Ел болашағында жақсы өзгерістер болсын десек, референдумға белсене қатысуымыз қажет деп санаймын. Референдум еліміздің болашақтағы даму бағдарын айқындайды. Мен еліміздің жарқын болашағы үшін, ұрпақтарымыздың келешегі үшін дауыс бердім. Еліміз аман, жұртымыз тыныш болсын! Қазақстан өркендей берсін,- деді Қ.Сүлейменов.
Сайлау учаскесінің төрағасы Серік Орынбаевтың айтуынша, таңнан бері дауыс берушілер қатары сиреген жоқ.
— Сайлау учаскесінде 2000-ға жуық адам тіркелген. Үйге 23 дауыс беру парақтары жіберілді. Биыл 22 жас азамат алғаш рет дауыс беріп, өз таңдауларын жасады. Ешқандай құқық бұзушылық тіркелген жоқ,- деді комиссия төрағасы.
Сымбат ҚАЙРАТҚЫЗЫ,
«Semeı tańy»
